16.02.2026 | 19:00
Կաթողիկոսին կարող են ձերբակալել, եթե ՔՊ-ն հաղթի հունիսի 7-ին․ մեղադրանքի առաջադրումը կանխատեսելի էր․ Անի Սամսոնյան․ ՏԵՍԱՆՅՈՒԹ
Իլոն Մասկը դարձել է աշխարհում առաջին մարդը, որի կարողությունը հասել է 500 մլրդ դոլարի
Քաղաքականություն
02.10.2025 | 14:10
Իլոն Մասկը հասել է ևս մեկ կարևոր նվաճման՝ դառնալով պատմության մեջ առաջին մարդը, որի կարողությունը կազմում է կես տրիլիոն դոլար։ Մոլորակի ամենահարուստ մարդու կարողությունն այժմ կազմում է 500 միլիարդ դոլար՝ ըստ Forbes-ի Real-Time Billionaires tracker-ի։
Մասկը, որը դեկտեմբերին դարձել էր պատմության մեջ առաջին մարդը, որի կարողությունը կազմում է 400 միլիարդ դոլար կամ ավելի, 150 միլիարդ դոլարով առաջ է երկրորդ տեղը զբաղեցնող Լարի Էլիսոնից և գտնվում է աշխարհի առաջին տրիլիոնատերը դառնալու կես ճանապարհին։
Չորեքշաբթի արևելյան ժամանակով ժամը 15:30-ի դրությամբ՝ Tesla-ի բաժնետոմսերն աճել են գրեթե 4%-ով՝ Մասկի կարողությանն ավելացնելով մոտավորապես 9,3 միլիարդ դոլարով։
Էլեկտրական մեքենաներ արտադրող ընկերության բաժնետոմսերի գինը գրեթե կրկնապատկվել է այն բանից հետո, երբ Մասկն առաջին անգամ ընկերության ապրիլյան եկամուտների մասին զեկույցում հայտարարել էր, որ հրաժարական է տալիս ԱՄՆ նախագահ Դոնալդ Թրամփի Կառավարության արդյունավետության գրասենյակի (DOGE) ղեկավարի պաշտոնից՝ ավելի շատ Tesla-ի վրա կենտրոնանալու համար: Tesla-ի շուկայական կապիտալիզացիան այժմ գտնվում է դեկտեմբերին գրանցված բոլոր ժամանակների ամենաբարձր ցուցանիշի 10%-ի սահմաններում, իսկ Մասկի 12% բաժնեմասն ընկերությունում այժմ գնահատվում է 191 միլիարդ դոլար:
Tesla-ն միակ ընկերությունը չէ, որին Մասկը պետք է շնորհակալ լինի իր կես տրիլիոն դոլարի կարողության համար: SpaceX-ը, որը նա հիմնադրել է 2002 թվականին, այժմ արժե 400 միլիարդ դոլար։ Մասկը SpaceX-ում ունի մոտավորապես 42% բաժնեմաս՝ 168 միլիարդ դոլար արժողությամբ: Կա նաև xAI Holdings-ը, որը Մասկը հիմնադրել է մարտին, երբ նա նոր արհեստական բանականության ընկերությունը՝ xAI-ը, միավորել է 2022 թվականին իր կողմից ձեռք բերված սոցիալական մեդիա ընկերության՝ X-ի (նախկինում՝ Twitter) հետ՝ գործարքի շրջանակում, որի արդյունքում միավորված ընկերությունը գնահատվել է 113 միլիարդ դոլար: Մասկը xAI Holdings-ում ունի մոտավորապես 53% բաժնեմաս՝ 60 միլիարդ դոլար արժողությամբ:
Forbes-ը նշում է, որ 500 միլիարդ դոլարի զուտ կարողության սահմանը հատելը Մասկի՝ կես տասնամյակի ընթացքում արձանագրված մի շարք նվաճումներից միայն վերջինն է: 2020 թվականի մարտին նրա կարողությունն ընդամենը 24,6 միլիարդ դոլար էր, իսկ Tesla-ի բաժնետոմսերի կտրուկ աճը նրան 2020 թվականի օգոստոսին դարձրել է 100 միլիարդ դոլար կարողությամբ պատմության մեջ հինգերորդ մարդը։
Նա առաջին անգամ դարձել է աշխարհի ամենահարուստ մարդը 2021 թվականի հունվարին՝ գրեթե 190 միլիարդ դոլար կարողությամբ: Այնուհետև, 2021 թվականի սեպտեմբերին նա դարձել էր 200 միլիարդ դոլար կարողությամբ պատմության մեջ երրորդ մարդը (Amazon-ի Ջեֆ Բեզոսից և LVMH շքեղ ապրանքների կոնգլոմերատի ֆրանսիացի Բեռնար Առնոյից հետո): Մասկի կարողությունը 2021 թվականի նոյեմբերին հասել է 300 միլիարդ դոլարի, իսկ 2024 թվականի դեկտեմբերին՝ 400 միլիարդ դոլարի:
Եթե Մասկը շարունակի այս տեմպերով, կարող է դառնալ աշխարհի առաջին տրիլիոնատերը մինչև 2033 թվականի մարտը։
Թարգմանությունը՝ Էմմա Չոբանյանի
