07.09.2026 | 17:00
Բաքուն Սոթքի հանքավայրի ադրբեջանական հատվածում
Ռուսական զորքերը հարվածել են ուկրաինական Խարկովին․ կան տուժածներ
Քաղաքականություն
01.10.2025 | 11:25
Ռուսական զորքերը հոկտեմբերի լույս 1-ի գիշերը հարված են հասցրել Խարկովին, որի հետևանքով վիրավորվել է վեց մարդ։ Այս մասին հայտարարել է Խարկովի քաղաքապետ Իգոր Տերեխովը, գրում է Current time-ը։
Նրա խոսքով՝ քաղաքի Սալտովսկի և Կիևսկի շրջաններին ավիառումբերով հարվածի հետևանքով ոչնչացվել են մասնավոր տներ և ավտոտնակներ, իսկ շուկաներից մեկում հրդեհ է բռնկվել։ Վնասվել են նաև մասնավոր տների և դեղատների պատուհաններ։
Խարկովի մարզային ռազմական վարչակազմի պետ Օլեգ Սինեգուբովը պարզաբանել է, որ վիրավորների թվում են 80-ամյա կին, ինչպես նաև երեք տղամարդ։ Նրանք հոսպիտալացվել են։ 21-ամյա երիտասարդի էլ դեպքի վայրում բժշկական օգնություն է ցուցաբերվել։
«Ռուսաստանը գիշերը ավիառումբերով և հրթիռներով հարվածներ է հասցրել Խարկովին, նրա արվարձաններին և Չուգուևսկի շրջանին»,- ասվում է Ուկրաինայի Արտակարգ իրավիճակների պետական ծառայության հայտարարության մեջ։
Նշվում է, որ Խարկովի Կիևսկի շրջանում 2800 քառակուսի մետր տարածքի վրա այրվել են առևտրի տաղավարներ։ Սալտովսկի շրջանում ավերվել և հետագայում հրդեհվել է բնակելի շենք, ինչպես նաև ավերվել և այրվել են ավտոտնակներ 350 քառակուսի մետր տարածքի վրա։ Ոստիկանությունն էլ ավելի ուշ հայտնել է, որ Խարկովի վրա գիշերային հարվածների ժամանակ վիրավորվել է վեց մարդ, այդ թվում՝ մեկ ոստիկան։
Խարկովը պարբերաբար ենթարկվում է ռուսական բանակի հարձակումներին: Ուկրաինայի իշխանությունները և միջազգային կազմակերպությունները քաղաքացիական ենթակառուցվածքների և քաղաքացիական անձանց վրա հարձակումները որակում են որպես Ռուսաստանի կողմից իրականացված ռազմական հանցագործություններ, մինչդեռ Ռուսաստանի իշխանությունները հերքում են դա՝ պնդելով, որ հարձակումներն ուղղված են ռազմական թիրախների դեմ:
Թարգմանությունը՝ Էմմա Չոբանյանի
