Պուտինը Ուկրաինայի տարածքների բռնազավթումն անվանել է «արդար մարտ»

Ռուսաստանը «արդար մարտ » է մղում Ուկրաինայում և պաշտպանում է Լուգանսկի, Դոնեցկի, Զապորոժիեի և Խերսոնի մարզերի «միլիոնավոր հայրենակիցների» որոշումը՝ լինելու Մոսկվայի հետ։ Այս մասին հայտարարել է Ռուսաստանի նախագահ Վլադիմիր Պուտինը, գրում է The Moscow Times-ը։

«Այսօր, պաշտպանելով այս ընտրությունը, մեր զինվորներն ու հրամանատարները մղում են արդար մարտ. ամբողջ երկիրը, ամբողջ Ռուսաստանը աշխատում է։ Միասին մենք պաշտպանում ենք մեր սերը մեր հայրենիքի նկատմամբ և մեր պատմական ճակատագրի միասնությունը», – ասել է Պուտինը ուկրաինական չորս մարզերի բռնակցման երրորդ տարվան նվիրված տեսաուղերձում։

Նա նշել է, որ օկուպացված քաղաքների և ավանների բնակիչների համար «դժվար է»:

«Կան շատ իսկապես հրատապ, անհետաձգելի խնդիրներ: Դրանց թվում են յուրաքանչյուր մարդու համար ամենաանհետաձգելի, կենսական հարցերը, ինչպիսիք են հուսալի ջրամատակարարումը, որակյալ առողջապահության հասանելիությունը և այլն», – նշել է Պուտինը:

Նրա խոսքով՝ մարտերի ընթացքում ավերվածը վերականգնելու համար իշխանությունները մեկնարկել են «մեր նախնիների, պատմական ռուսական հողերը վերակենդանացնելու» ծրագիրը։

Այս ծրագրի շրջանակներում օկուպացված տարածքներում կառուցվում են բնակելի շենքեր, դպրոցներ և հիվանդանոցներ, ինչպես նաև էներգետիկ, կապի, բնակարանային և կոմունալ ենթակառուցվածքներ, ընդգծել է Պուտինը։

Նա խոստացել է ապագայում ապահովել անհրաժեշտ պայմանները «նոր տարածաշրջաններում» և բացահայտել դրանց «հսկայական ներուժը»։

Ռուսաստանի իշխանությունները 2022 թվականի սեպտեմբերին անցկացրել են «հանրաքվեներ» «ԴԺՀ», «ԼԺՀ» և Զապորոժիեի ու Խերսոնի մարզերի Ռուսաստանին միացման վերաբերյալ։ Նույն թվականի սեպտեմբերի 30-ին Պուտինը հայտարարել էր ուկրաինական շրջանների անեքսիայի մասին։

Նա դա արել էր Ուկրաինայի զինված ուժերի կողմից Խարկովի և Խերսոնի մարզերում հաջող հակագրոհի ֆոնին։ Սակայն ռուսական զորքերը երբեք լիովին չեն վերահսկել չորս ուկրաինական մարզերը։ Ռուսաստանը գրավել է Դոնբասի մոտավորապես 88%-ը և Զապորոժիեի ու Խերսոնի մարզերի 73%-ը, որոնք կազմում են Ուկրաինայի տարածքի մոտավորապես 20%-ը։

Ավելի վաղ Կրեմլին մոտ կանգնած աղբյուրները Reuters-ին հայտնել էին, որ մարտական ​​գործողությունները դադարեցնելու համար Պուտինը պահանջել է Ուկրաինայի զինված ուժերի լիակատար դուրսբերում Դոնբասի չօկուպացված մասից՝ Զապորոժիեի և Խերսոնի մարզերում ռազմաճակատի սառեցման դիմաց։

Նա նաև առաջարկել էր Կիևին վերադարձնել Խարկովի, Սումիի, Դնեպրոպետրովսկի և Նիկոլաևի մարզերի գրավված տարածքները։ Սակայն Ուկրաինայի նախագահ Վլադիմիր Զելենսկին հայտարարել է, որ Պուտինի հետ անմիջական բանակցություններում կքննարկի միայն տարածքային հարցերը։ Ռուսաստանի նախագահն իր հերթին նշել է, որ նման հանդիպման իմաստ չի տեսնում։

Թարգմանությունը`Էմմա Չոբանյանի