ԱՄՆ Պաշտպանության նախարար Փիթ Հեգսեթը քննադատել է գեր զինծառայողներին և գեներալներին՝ դա անվանելով «վատ կերպար»։ Նա նաև հայտարարել է խիստ սափրվելու չափանիշների վերականգնման մասին՝ հայտարարելով, որ «մորուքավոր տղամարդկանց դարաշրջանն ավարտվել է»։ Ըստ նրա՝ ովքեր չեն կարողանում հանձնել ֆիզիկական թեստեր կամ բավարարել արտաքին տեսքի պահանջները, պետք է փնտրեն «նոր պաշտոն կամ նոր մասնագիտություն», գրում է France 24-ը։
Նա կրկին հայտարարել է «Պաշտպանության նախարարության» փոխարեն «Պատերազմի նախարարություն» անվանմանը վերադարձի մասին «և հրապարակել 10 նոր հրահանգներ՝ զինծառայողների ֆիզիկական պատրաստվածության, արտաքին տեսքի և չափորոշիչների վերաբերյալ: Հեգսեթը հայտարարել է, որ «Պաշտպանության նախարարության դարաշրջանն ավարտվել է», և Պենտագոնի առաքելությունն է «պատերազմ վարել՝ պատերազմին պատրաստվել և հաղթել»:
Հեգսեթը Պենտագոնի նախկին ղեկավարությանը մեղադրել է սպաներին ռասայական և գենդերային քվոտաների հիմքով առաջ մղելու մեջ, մասնավորապես, «կիսաշրջազգեստով տղամարդկանց» պաշտոնի բարձրացման մեջ։ Նա հայտարարել է․
«Մենք շեղվել էինք ճանապարհից և դարձել «առաջադեմ» գերատեսչություն, բայց այլևս չենք լինի»։ Հեգսեթը նաև հայտարարել է Պենտագոնի ներքին վերահսկողության համակարգի և հավասար հնարավորությունների ծրագրերի բարեփոխումների մասին։ Նա նաև խոստացել է 20%-ով կրճատել չորսաստղանի գեներալների և ծովակալների թիվը, իսկ ավագ սպաների ընդհանուր թիվը՝ 10%-ով։
Միևնույն ժամանակ, The Washington Post-ը հաղորդել էր Պենտագոնի քաղաքական և ռազմական ղեկավարության միջև լուրջ տարաձայնությունների մասին: Մի քանի բարձրաստիճան սպաներ, այդ թվում՝ Միացյալ շտաբների պետերի կոմիտեի նախագահ, գեներալ Դեն Քեյնը, մտահոգություն են հայտնել Թրամփի վարչակազմի կողմից մշակվող նոր պաշտպանական ռազմավարության վերաբերյալ: Լրատվամիջոցը, հղում անելով ութ ներկա և նախկին պաշտոնյաների, գրում է, որ ռազմական ղեկավարները ծրագիրը համարում են «կարճատես» և հնարավոր է՝ անտեղի։ Քննադատությունը վերաբերում է Պենտագոնի կողմից Միացյալ Նահանգների ներսում սպառնալիքների նկատմամբ առաջնահերթությունների փոփոխությանը, միաժամանակ ուշադրությունը սևեռելով Չինաստանի հետ գլոբալ մրցակցությանը և Ամերիկայի դերին Եվրոպայում ու Աֆրիկայում:
Թարգմանությունը՝ Էմմա Չոբանյանի
