Ադրբեջանի վարչապետը Մինսկում ԱՊՀ նիստում, այսպես կոչված, «Զանգեզուրի միջանցքից» է խոսել

Ադրբեջանն ակտիվորեն ընդլայնում է տնտեսական համագործակցությունը ԱՊՀ երկրների հետ. վերջին ութ ամիսների ընթացքում առևտրաշրջանառությունն աճել է ավելի քան 21%-ով։ Այս մասին հայտարարել է Ադրբեջանի վարչապետ Ալի Ասադովը Մինսկում ԱՊՀ կառավարությունների ղեկավարների խորհրդի նիստում ունեցած ելույթում։

Նա նաև ընդգծել է ժամանակակից տրանսպորտային և լոգիստիկ ենթակառուցվածքների կարևորությունը միջազգային առևտրի զարգացման համար՝ նշելով, թե «վերջին տարիներին Ադրբեջանը դարձել է Եվրասիայի հիմնական տրանսպորտային և լոգիստիկ կենտրոններից մեկը»։

«Մենք անընդհատ աշխատում ենք մեր տրանսպորտային ենթակառուցվածքների արդիականացման ուղղությամբ, մեծ ուշադրություն է դարձվում Արևելք-Արևմուտք և Հյուսիս-Հարավ միջազգային տրանսպորտային միջանցքների զարգացմանը։ Բացի այդ, հաշվի առնելով տարածաշրջանում ստեղծված նոր իրողությունները՝ մենք սկսում ենք ակտիվորեն աշխատել նոր Զանգեզուրի միջանցքի ուղղությամբ, որը կկապի Ադրբեջանը Նախիջևանի Ինքնավար Հանրապետության հետ»,- հավելել է Ասադովը՝ ադրբեջանցի այլ պաշտոնյաների պես շարունակելով կիրառել, այսպես կոչված, «Զանգեզուրի միջանցք» եզրույթը։

Վաշինգտոնում օգոստոսի 8-ին ստորագրված համաձայնագրերով որևէ «Զանգեզուրի միջանցքի» մասին խոսք չկա։ Դրանցում նշվում է «Թրամփի երթուղու» (TRIPP) մասին, սակայն Բաքվի քարոզչամեքենան ու ադրբեջանցի պաշտոնյաները շարունակում են միջանցք եզրույթն օգտագործել՝ խեղաթյուրելով նաև  ստորագրված փաստաթղթերի բովանդակությունը։

Օրերս էլ ՄԱԿ-ի ամբիոնից Ադրբեջանի նախագահ Իլհամ Ալիևն էր կրկին «Զանգեզուրի միջանցք» արտահայտությունն օգտագործել։ Նրան հետագայում ՄԱԿ-ի ամբիոնից արձագանքել էր ՀՀ վարչապետ Նիկոլ Փաշինյանը։

Հավելենք, որ ավելի վաղ հայտնի էր դարձել, որ սեպտեմբերի 29-ին Մինսկում կալանալիք ԱՊՀ կառավարության ղեկավարների խորհրդի նիստին Հայաստանը կմասնակցի փոխվարչապետ Մհեր Գրիգորյանի մակարդակով։ Այս մասին Factor.am-ին հայտնել էին փոխվարչապետի գրասենյակից՝ մանրամասնելով, որ նիստին Գրիգորյանը կմասնակցի հեռավար։

Թարգմանությունը՝ Էմմա Չոբանյանի