Ալիևը «Զանգեզուրի միջանցք» արտահայտությունն օգտագործել է նաև ՄԱԿ-ի ամբիոնից

Ադրբեջանի նախագահ Իլհամ Ալիևը ՄԱԿ-ի Գլխավոր վեհաժողովի 80-րդ նստաշրջանում ունեցած ելույթում դարձյալ դժգոհել է ԵԱՀԿ Մինսկի խմբի գործունեությունից՝ նշելով, թե հակամարտությունը լուծելու համար 1992 թվականին ստեղծված կառույցը չի կարողացել կատարել իր առաքելությունը։ Նա հայտարարել է, թե Ադրբեջանն առաջ է քաշել միջազգային իրավունքի վրա հիմնված հինգ հիմնարար սկզբունքներ և ներկայացրել է խաղաղության պայմանագրի նախագիծ, հաղորդում են ադրբեջանական լրատվամիջոցները։

«Մեր նախաձեռնությամբ սկսվել են խաղաղության համաձայնագրի նախագծի տեքստի շուրջ բանակցություններ, որոնք տևել են 2022 թվականի հոկտեմբերից մինչև 2025 թվականի ամառ։ Չնայած տարբեր սադրանքներին՝ բանակցությունները դրական արդյունքներ են տվել, քանի որ դրանք անցկացվել են բացառապես երկկողմանի հիմունքներով՝ առանց որևէ արտաքին միջամտության»,- ասել է Ալիևը՝հավելելով․

«Ադրբեջանը մտել է նոր դարաշրջան։ Մենք հաղթել ենք և՛ պատերազմում, և՛ խաղաղության հաստատման մեջ։ Մենք վերջ ենք դրել օկուպացիային և անցել վերականգնողական աշխատանքներին։ Արդարությունը հաղթանակել է, ինքնիշխանությունը ամրապնդվել, և խաղաղությունը փաստացի  հաստատվել է։ Մենք պատրաստ ենք կիսվել այս դրական փորձով»։

Նա անդրադարձել է նաև TRIPP-ին՝ Թրամփի երթուղուն, սակայն, կրկին օգտագործելով «Զանգեզուրի միջանցք» արտահայտությունը։

«Տարածաշրջանային հաղորդակցությունները կազմում են մեր կայուն խաղաղության տեսլականի հիմքը։ Վաշինգտոնյան գագաթնաժողովի կարևոր արդյունքներից մեկը Թրամփի միջազգային խաղաղության և բարգավաճման ուղին է (TRIPP), որը կապահովի «Զանգեզուրի միջանցք»-ով անարգել անցում և կամրապնդի տարածաշրջանային կապերը»,- հավելել է նա՝ հերթական անգամ խեղաթյուրելով Վաշինգոտնում ստորագրված փաստաթղթեր բովանդակությունը։

Վաշինգտոնում օգոստոսի 8-ին ստորագրված համաձայնագրերով որևէ «Զանգեզուրի միջանցքի» մասին խոսք չկա։ Դրանցում նշվում է «Թրամփի երթուղու» (TRIPP) մասին, սակայն Բաքվի քարոզչամեքենան ու ադրբեջանցի պաշտոնյաները շարունակում են միջանցք եզրույթն օգտագործել։

Ի դեպ, Ալիևը նաև հայտարարել է, որ Վաշինգտոնի գագաթնաժողովը նշանավորում է Ադրբեջանի և Միացյալ Նահանգների միջև հարաբերությունների նոր փուլի սկիզբը։

Նա նշել է, թե ԱՄՆ նախագահ Դոնալդ  Թրամփի որոշումը՝ կասեցնելու 1992 թվականին Ադրբեջանի նկատմամբ կիրառված պատժամիջոցները «Ազատության աջակցության մասին» օրենքի 907-րդ ուղղման տեսքով, նույնպես պատմական քայլ է։ Ըստ Ալիևի՝ ԱՄՆ Կոնգրեսի կողմից 907-րդ ուղղման վերջնական չեղարկումը վերջ կդնի երկակի ստանդարտների ժառանգությանը և կամրապնդի վստահությունն ու համագործակցությունը այն ժամանակ, երբ Ադրբեջանը ըստ Ալիևի, «նպաստում է համաշխարհային անվտանգությանն ու կայունությանը»։

Թարգմանությունը՝ Էմմա Չոբանյանի