Ադրբեջանը զինվում է միլիարդավոր դոլարների իսրայելական, թուրքական և սերբական զենքերով՝ պատրաստվելով հնարավոր հակամարտության․ անդրադարձ

2020 թվականին Հայաստանի դեմ պատերազմում հաղթանակ տանելուց հետո Ադրբեջանն ամրապնդել է կապերը Իսրայելի հետ, մի երկրի, որի մասին հաղորդագրությունները վկայում են, որ այն Բաքվում ունի ավիաբազա: 12-օրյա պատերազմի ընթացքում Իրանն ուղղակիորեն մեղադրել է Բաքվին Իսրայելին օդային տարածք և ռազմական լոգիստիկ մուտքի թույլտվության մեջ։ Այս մասին ասվում է ռազմական հարցերում մասնագիտացված Defense Arabia-ի անդրադարձում։

Ըստ լրատվամիջոցի, սակայն, հակասությունները դրանով չեն ավարտվում: Ադրբեջանի նախագահը մարտահրավեր է նետել ռուսներին՝ նրանց զինվորներին անվանելով հարբած և անգործունակ՝ համեմատած պրոֆեսիոնալ ադրբեջանական բանակի հետ (չի նշվում, սակայն, թե երբ է Ադրբեջանի նախագահ Իլհամ Ալիևը նման հայտարարություն արել):

Ըստ լրատվամիջոցի՝ խոցված ադրբեջանական ինքնաթիռի հետ կապված միջադեպից առաջ Ադրբեջանի նախագահը Պուտինին մաֆիայի պարագլուխ էր անվանել (կրկին չի ասվում՝ երբ է նման հայտարարություն եղել)։ Երկու կողմերից էլ լրագրողների ձերբակալություններ տեղի են ունեցել, լարվածությունն աճում է ռուսների կողմից Ուկրաինայում ադրբեջանական խողովակաշարերի ռմբակոծության պատճառով։

Փաստն այն է, որ Ադրբեջանը դարձել է տարածաշրջանային նշանակալի խաղացող և զինվում է մինչև ատամները։

Վերջերս երկիրը հայտարարել է 48 Nora-B52 NG հրետանային համակարգի գնման մասին, որոնց ընդհանուր թիվը կազմում է ավելի քան 400 ինքնագնաց համակարգ։ Նշվում է, որ ադրբեջանական բանակն ունի առնվազն 600 MLRS, այդ թվում՝ 100 կառավարվող հրթիռային համակարգեր, որոնց հեռահարությունը շատ ավելի մեծ է, քան HIMARS-ինը։

Elbit-ն էլ արդիականացնում է ավելի քան 1300 տանկ, հիմնականում՝ Aslan T72-ներ, չեխական և ադրբեջանական ընկերությունների մասնակցությամբ, որոնցում ներառված են Kontakt 5-ը և էլեկտրոնիկայի համապարփակ հավաքածու։ Զրահապատ մեքենաները հագեցվում են 4 SPIKE NLOS հրթիռներից բաղկացած հավաքածուներով։

Հակաօդային պաշտպանության համակարգերում կատարվել է հսկայական ներդրում, որը գնահատվում է միլիարդավոր դոլարներ։ Նշվում է, որ երկրում շահագործվում է մոտ 10 PantiSir-S1 մարտկոց, 2 S-300PMU2 մարտկոց և խորհրդային ծագում ունեցող մի շարք համակարգեր, ինչպիսիք են Իսրայելի կողմից արդիականացված 9K33 OSA-ն, ինչպես նաև «Երկաթե գմբեթ» մարտկոցները, և վերջին իսրայելական համակարգերը, ինչպիսիք են BARAK MX/BARAK 8-ը՝ հարյուրավոր հրթիռներով։

Այս զինանոցին ավելացվել է նաև այն, որ Իսրայելն Ադրբեջանին մատակարարել է առնվազն 100 LORA կիսաբալիստիկ հրթիռ,  նաև բանակցություններ է վարել Թուրքիայի հետ SOM ŞAHIN թևավոր հրթիռների տեղակայման վերաբերյալ։ Այս հրթիռները կտեղակայվեն 50-60 պակիստանյան JF-17 Thunder/C կործանիչների վրա՝ ավելի քան 6 միլիարդ դոլար արժողությամբ պայմանագրերով։

Լրատվամիջոցն ընդգծում է, որ Ադրբեջանը շրջապատված է երեք երկրով, որոնք վերջերս ներգրավված էին ռազմական և դիվանագիտական ​​հակամարտությունների մեջ՝ Հայաստան, Իրան և Ռուսաստան, և ակտիվորեն պատրաստվում է հնարավոր հակամարտության։

Ընդգծվում է, որ զինանոցը հսկայական է 10 միլիոնից պակաս բնակչություն ունեցող երկրի համար, որին աջակցում են Թուրքիան և Իսրայելը՝ երկու երկրներ, որոնք ունեն նշանակալի ռազմական արդյունաբերություն, ինչը վկայում է համալրման մեծ ներուժի մասին։

Թարգմանությունը՝ Էմմա Չոբանյանի