16.12.2025 | 15:36
Ճամբարակի համայնքապետին պատկանող ինքնակամ շինությունը պետք է քանդվի․ Դատախազությունը միջնորդագիր է ուղարկել
Արևմուտքը պետք է միավորվի Ռուսաստանի դեմ. Լեհաստանի ԱԱԲ ղեկավար
Քաղաքականություն
24.10.2018 | 16:31
Արևմուտքը պետք է միավորվի Ռուսաստանի դեմ: Վարշավայում մեկնարկած Անվտանգության հարցերով ֆորումի ընթացքում այս մասին հայտարարել է Լեհաստանի Ազգային անվտանգության բյուրոյի (ԱԱԲ) ղեկավար Պավել Սոլոխը:
ՌԻԱ Նովոստիի փոխանցմամբ՝ նա հայտարարել է, որ Մոսկվան «փորձում է խախտել համաշխարհային կարգն ու համաշխարհային անվտանգությունը»:
«Ռուսաստանը ռազմավարական մարտահրավեր է անվտանգությանը: Ոչ միայն Լեհաստանի և տարածաշրջանի, այլև ամբողջ մայրցամաքի: Մեր միասնությունն առավել, քան երբևէ կարևոր է: Ոչ միայն ՆԱՏՕ-ի շրջանակում, այլ ամբողջ արևմտյան հանրության: Մեր պատասխանը պետք է համակարգված լինի»,- ասել է Սոլոխը:
ԱԱԲ ղեկավարը Լեհաստանում ՆԱՏՕ-ի մշտական բազայի հնարավոր տեղակայումն «ամբողջ տարածաշրջանի անվտանգության մեջ ներդրում» է կոչել:
Վերջին շրջանում Լեհաստանում ակտիվորեն շրջանառվում է Ռուսաստանից սպասվող ռազմական վտանգի թեման: Այս կապակցությամբ ծրագրվում է կտրուկ ավելացնել լեհական բանակի թիվը, Լեհաստանում ՆԱՏՕ-ի բազմազգ գումարտակ և ԱՄՆ-ի զրահատանկային բրիգադ տեղակայել:
Արձագանքելով սրան՝ ՌԴ ԱԳ նախարար Սերգեյ Լավրովն ասել է, որ ՆԱՏՕ-ն օգտվում է առիթից՝ Ռուսաստանի սահմաններին մոտ ավելի շատ տեխնիկա և զինվորականների տեղակայելու համար: ՌԴ պաշտպանության նախարար Սերգեյ Շոյգուն իր հերթին հայտարարել է, որ Լեհաստանի տարածքում ամերիկյան զինվորականների տեղակայումը չի նպաստի տարածաշրջանային անվտանգության ամրապնդմանը և Մոսկվային կստիպի պատասխան քայլեր ձեռնարկել:
«Այս պայմաններում մենք ստիպված կլինենք պատրաստ լինեն չեզոքացնել բոլոր ուղղություններով հնարավոր ռազմական սպառնալիքները»,- ասել է Շոյգուն:
