Կրեմլի հետ կապված մոլդովացի միլիարդատեր Վլադիմիր Պլախոտնյուկը Հունաստանից արտահանձնվել է Մոլդովային

«Մոլդովական լվացքատան» կազմակերպիչ, միլիարդատեր, Մոլդովայի Դեմոկրատական ​​կուսակցության նախկին առաջնորդ Վլադիմիր Պլախոտնյուկն այսօր Աթենքից տեղափոխվել է Քիշնև։ Մոլդովայի արդարադատության նախարար Վերոնիկա Միխայլով-Մորարուն հայտարարել է, որ նրան անմիջապես կտեղափոխեն թիվ 13 բանտի մենախուց, գրում է The Insider-ը։

Պլախոտնյուկը ձերբակալվել էր հուլիսի 22-ին Աթենքի օդանավակայանում՝ Դուբայ թռչելու փորձի ժամանակ։ Նրանից առգրավվել է քսանմեկ անձնագիր և անձը հաստատող քարտ, որոնք, ենթադրաբար, տրամադրվել են Մոլդովայի, Ռումինիայի, Ռուսաստանի, Ուկրաինայի, Բուլղարիայի, Իրաքի և Վանուատուի իշխանությունների կողմից։ Նախկին պատգամավոր Կոնստանտին Ցուտուն նույնպես ձերբակալվել է հինգ կեղծ փաստաթղթերով։

Մոլդովայի դատախազությունը Պլախոտնյուկին մեղադրանք է առաջադրել երեք դրվագով, այդ թվում՝ 2014 թվականին երկրի բանկային համակարգից 1 միլիարդ դոլարի հափշտակության համար։ Հետաքննության տվյալներով՝ նա Իլան Շորի ընկերությունների միջոցով ստացել է 39 միլիոն դոլար և 3,5 միլիոն եվրո։ 2025 թվականի փետրվարին Ինտերպոլը նրա նկատմամբ միջազգային հետախուզում էր հայտարարել։

The Insider-ը պարզել էր, որերկրից փախուստի դիմելուց հետո Պլախոտնյուկը բազմիցս այցելել է Մոսկվա՝ օգտագործելով կեղծ փաստաթղթեր, և բանակցություններ վարել Ռուսաստանի նախագահի աշխատակազմի ղեկավարի տեղակալ Դմիտրի Կոզակի հետ։ Կրեմլը փորձում էր ապահովել Մոլդովայի ամենահարուստ մարդու աջակցությունը ընտրություններից առաջ։ Նրա վերջին այցը Մոսկվա տեղի է ունեցել 2025 թվականի գարնանը։

Պլախոտնյուկի դեմ Ռուսաստանում նույնպես գործեր են հարուցվել՝ պաշտոնապես հանցավոր կազմակերպություն ստեղծելու, թմրանյութերի մաքսանենգության և փողերի լվացման համար։ Սակայն Մոլդովայի իշխանությունները կարծում են, որ Մոսկվան այս գործերն օգտագործում է որպես Կրեմլի կողմից հովանավորվող օլիգարխներին պաշտպանելու գործիք։

Լրատվամիջոցները նաև հայտնում են, որ Պլախոտնյուկը կալանավորվել է 30 օրով՝ նախկինում տրված չորս դատական ​​որոշումների հիման վրա։ Նա դեռևս չի հարցաքննվել, քանի որ, ըստ ընթացակարգի, կարող է ցուցմունք տալ միայն մեղադրանքներին պաշտոնապես ծանոթանալուց հետո։

Թարգմանությունը՝ Էմմա Չոբանյանի