«Պուտինին հիմա կանգնեցնելն ավելի էժան է». Զելենսկին ՄԱԿ-ի ամբիոնից աշխարհին կոչ է արել ճնշում գործադրել ՌԴ-ի վրա

ՌԴ նախագահ Վլադիմիր Պուտինին և նրա ագրեսիան Ուկրաինայի ու այլ երկրների դեմ կանգնեցնելն այժմ ավելի էժան է։ Աշխարհը պետք է համատեղ գործի՝ Ռուսաստանին խաղաղություն ստիպելու համար։ Այս մասին հայտարարել է Ուկրաինայի նախագահ Վլադիմիր Զելենսկին ՄԱԿ-ի Գլխավոր վեհաժողովի ընդհանուր քննարկման ժամանակ իր ելույթում, գրում է ՌԲԿ Ուկրաինան։

Նրա խոսքով՝ պատերազմը և սպառազինությունների մրցավազքը կանգնեցնելն ավելի էժան է, քան ստորգետնյա մանկապարտեզներ կամ հսկայական բունկերներ կառուցելը՝ կարևորագույն ենթակառուցվածքները թաքցնելու համար։

«Պուտինին հիմա կանգնեցնելն ավելի էժան է, քան փորձել պաշտպանել յուրաքանչյուր նավահանգիստ և նավ ահաբեկիչներից ու ծովային անօդաչու թռչող սարքերից։ Մենք պետք է միասին գործենք տարբեր կերպ՝ ագրեսորին կանգնեցնելու համար։ Այդ դեպքում մենք հնարավորություն կունենանք կանխելու, որ այս սպառազինությունների մրցավազքը մեզ աղետ չի բերի»,- նշել է Զելենսկին։

Նա ընդգծել է, որ եթե զենքի և Ռուսաստանի վրա ճնշման կարիք կա, դա պետք է արվի հիմա, հակառակ դեպքում, Պուտինը կշարունակի պատերազմը մղել՝ այն ընդլայնելով։

«Մենք արդեն ասել ենք, որ Ուկրաինան միայն առաջինն է, բայց հիմա ռուսական անօդաչու թռչող սարքերը թռչում են Եվրոպայի վրայով, և ռուսական գործողությունները տարածվում են բազմաթիվ երկրներում։ Պուտինը ցանկանում է շարունակել այս պատերազմը։ Ոչ ոք չի կարող իրեն անվտանգ զգալ»,- հավելել է Զելենսկին։

Ըստ Ուկրաինայի նախագահի՝ միջազգային ինստիտուտները թուլացել են, «այդ պատճառով էլ այս խելագարությունը շարունակվում է», Ռուսաստանի պատերազմը Ուկրաինայի դեմ շարունակվում է, և հրադադարի ուղղությամբ առաջընթաց չկա։ Նա անօդաչու թռչող սարքերի օգտագործումը պատերազմական գործողություններում անվանել է սպառազինությունների մրցավազքի ամենավտանգավոր զարգացումը։

«Մենք անօդաչու թռչող սարքեր ենք կառուցում մեզ պաշտպանելու համար։ Մենք հաջողությամբ անօդաչու թռչող սարքեր ենք օգտագործում ռուսական նավերի դեմ։ Ռուսաստանը մեզ այլ ընտրություն չի թողել»,- ընդգծել է Զելենսկին։

Նախօրեին Զելենսկին ՄԱԿ-ի Գլխավոր վեհաժողովի շրջանակում հանդիպել էր ԱՄՆ նախագահ Դոնալդ Թրամփի հետ։ ՄԱԿ-ի ամբիոնից Ուկրաինայի նախագահը հանդիպումը որակել է լավ։

Թարգմանությունը՝ Էմմա Չոբանյանի