ՀՀ-ի և Ադրբեջանի ԱԳ նախարարները հրավիրվել են ԵՄ նախարարական հանդիպմանը, Վրաստանի նախարարը՝ ոչ․ Թբիլիսին դժգոհ է

Եվրոպական արտաքին գործողությունների ծառայության կողմից Լյուքսեմբուրգում նախատեսված նախարարական հանդիպմանը Վրաստանին ընդամենը դեսպանի մակարդակով հրավիրելը ցույց է տալիս Եվրամիության ինստիտուտների կողմից լրջության բացակայությունը և ոչ միայն աշխարհաքաղաքական, այլև պարզ աշխարհագրական իրականության անտեսումը։ Այս մասին ասվում է Վրաստանի ԱԳՆ հայտարարության մեջ, փոխանցում է վրացական Առաջին ալիքը։

Նշվում է, որ դա ևս մեկ փորձ է՝ ԵՄ միջոցառումներին Վրաստանի մասնակցության հարցը քաղաքական շահարկումների ենթարկելու։

«Վրաստանը դեսպանի մակարդակով չի մասնակցի հոկտեմբերի 20-ին Լյուքսեմբուրգում նախատեսված կապի հարցերով նախարարական հանդիպմանը, որին Եվրոպական արտաքին գործողությունների ծառայությունը հրավիրել է Կենտրոնական Ասիայի և Արևելյան գործընկերության երկրների՝ Հայաստանի, Ադրբեջանի, Թուրքիայի, Թուրքմենստանի, Ուզբեկստանի, Տաջիկստանի, Ղազախստանի և Ղրղզստանի արտաքին գործերի նախարարներին: Հաշվի առնելով այս թեմայի կարևորությունը և Վրաստանի դերը կապի հարցերում՝ նախարարական հանդիպման դեսպանի մակարդակով հրավերն անընդունելի է, և նման մոտեցման հիմնավորումը մնում է անհասկանալի: Եվրոպական արտաքին գործողությունների ծառայությունը մի քանի շաբաթ առաջ տեղեկացվել է այս հանդիպմանը մասնակցելու վերաբերյալ Վրաստանի դիրքորոշման մասին: Հաշվի առնելով Վրաստանի դերը թե՛ տարածաշրջանային անվտանգության, թե՛ կապի հարցերում, Վրաստանի մասնակցությունը նման կարևոր քննարկումներին պետք է տեղի ունենա համապատասխան մակարդակով և բխի ԵՄ անդամ պետությունների շահերից»,- ասվում է հայտարարության մեջ։

Նշվում է, որ դա Վրաստանում արմատական ​​օրակարգ և բևեռացում խթանելու ևս մեկ փորձ է։

Թբիլիսին հույս է հայտնել, որ ԵՄ անդամ պետությունների մեծամասնությունը լավ գիտակցում է աշխարհաքաղաքական կարիքները, գնահատում է Վրաստանի հետ գործընկերությունը, նրա դերը Եվրոպան և Ասիան կապելու գործում և չի կիսում Եվրոպական արտաքին գործողությունների ծառայության վերաբերմունքը Վրաստանի մասնակցության նկատմամբ։

Թարգմանությունը՝ Էմմա Չոբանյանի