29.04.2026 | 00:57
Չեմպիոնների լիգա․ ՊՍԺ-ն գերգոլառատ խաղում հաղթեց «Բավարիային». ՏԵՍԱՆՅՈՒԹ
ՄԱԳԱՏԷ-ի ղեկավարը հավակնում է ՄԱԿ-ի գլխավոր քարտուղարի պաշտոնին
Քաղաքականություն
23.09.2025 | 18:22
Ատոմային էներգիայի միջազգային կազմակերպության (ՄԱԳԱՏԷ) գլխավոր տնօրեն Ռաֆայել Գրոսսին հայտարարել է ՄԱԿ-ի գլխավոր քարտուղարի պաշտոնում առաջադրվելու մտադրության մասին, փոխանցում է ՏԱՍՍ-ը։
Համաշխարհային կազմակերպության գործող ղեկավար Անտոնիո Գուտերեշի լիազորությունները լրանում են 2026 թվականի դեկտեմբերի 31-ին։ Նույն թվականին ՄԱԿ-ի Անվտանգության խորհուրդը պետք է գլխավոր քարտուղարի պաշտոնի թեկնածու առաջադրի, իսկ ընտրված թեկնածուն պետք է պաշտոնը ստանձնի 2027 թվականի հունվարի 1-ին։
«ՄԱԿ-ն այժմ դժվարին իրավիճակում է։ Ես կարծում եմ, որ հնարավոր է ՄԱԿ-ը դարձնել արդիական։ Եթե դուք ասում եք, որ մտահոգված եք հակամարտությունների աճով, բռնության աճով, ապա որոշ չափով երեսպաշտություն է կենտրոնանալ այլ բաների վրա»,- ասել է Գրոսսին Նյու Յորքում ՄԱԿ-ի Գլխավոր վեհաժողովի շրջանակում Agence France-Presse-ին տված հարցազրույցում։
Ըստ նրա՝ «բոլորը գիտակցում են», որ ՄԱԿ-ն այլևս չի կատարում համաշխարհային խաղաղությունը պահպանելու իր առաքելությունը։ Այս առումով Գրոսսին վստահեցրել է, որ ՄԱԳԱՏԷ-ի ղեկավարի պաշտոնում իր փորձը կօգնի իրեն ընտրություններում։ Գրոսսին նաև հայտարարել է, որ կձգտի երկխոսություն վարել «բոլորի հետ» և «լինել բոլորի համար ընդունելի միջնորդ»։
«Այո՛, ես թեկնածու կլինեմ այս պատճառներով»,- նշել է նա։
Գրոսսին նշել է, որ հույս ունի «ստանալ որքան հնարավոր է շատ աջակցություն»։
Գլխավոր քարտուղարն ընտրվում է ՄԱԿ-ի Անվտանգության խորհրդի և հաստատվում Գլխավոր վեհաժողովի կողմից։ Նրա պաշտոնավարման ժամկետը 5 տարի է՝ երկարաձգման հնարավորությամբ։ Ժամկետի սահմանափակում չկա, սակայն ոչ ոք այդ պաշտոնը չի զբաղեցրել ավելի քան 10 տարի։ ՄԱԿ-ի գլխավոր քարտուղարը չի ընտրվում Անվտանգության խորհրդի մշտական անդամներից (ԱՄՆ, Ռուսաստան, Ֆրանսիա, Միացյալ Թագավորություն և Չինաստան)։
Թարգմանությունը՝ Էմմա Չոբանյանի
