Եկատերինբուրգում կրկին ադրբեջանցիներ են ձերբակալվել

Եկատերինբուրգում ուժայինները ձերբակալել են երկու ադրբեջանցիների՝ Էլմադին Աղաևին և Միրխաս Վերդիևին: Նախնական տեղեկությունների համաձայն՝ նրանք կասկածվում են կեղծ ալկոհոլի ապօրինի վաճառքի մեջ։ Այս մասին հայտնում են ադրբեջանական լրատվամիջոցները՝ վկայակոչելով ռուսական աղբյուրներին։

Հստակ չէ՝ նրանց նկատմամբ խափանման միջոց ընտրվե՞լ է, թե՞ ոչ։ Իրավապահ մարմինների աշխատակիցները չեն մեկնաբանել այս ձերբակալությունները։

Հավելենք, որ Ադրբեջանի և Ռուսաստանի հարաբերությունները կրկին սրվել են այն բանից հետո, երբ հունիսի 27-ին Եկատերինբուրգում ձերբակալվել էր ադրբեջանական ծագում ունեցող ավելի քան 50 անձ։ Ձերբակալության ընթացքում մահացել էր առնվազն երկու մարդ՝ Ադրբեջանի 60-ամյա քաղաքացի Հուսեյն Սաֆարովը և նրա եղբայրը՝ 55-ամյա Զիյադդինը։ Բաքուն պահանջում է պատասխանատվության ենթարկել մեղավորներին։ Ադրբեջանական կողմն ավելի վաղ հրապարակել էր Եկատերինբուրգում ռուսական իրավապահ մարմինների գործողությունների արդյունքում սպանված ադրբեջանցի եղբայրների մարմինների դատաբժշկական փորձաքննության եզրակացությունը։ Փորձաքննությունը, ըստ ադրբեջանական կողմի, հաստատել է, որ Զիյադդին և Հուսեյն Սաֆարովները ենթարկվել են դաժան խոշտանգումների, նրանց մարմինների վրա հայտնաբերվել են բազմաթիվ վնասվածքներ։

Ադրբեջանի Գլխավոր դատախազությունն հարուցել է քրեական գործ՝ ՌԴ-ում Ադրբեջանի քաղաքացիների և ադրբեջանական ծագում ունեցող անձանց նկատմամբ խոշտանգումների և առանձնակի դաժանությամբ դիտավորյալ սպանության փաստի առթիվ։

Թարգմանությունը՝ Էմմա Չոբանյանի