ՌԴ-ն լիարժեք պատասխանատվություն է կրում․ ՆԱՏՕ-ի զգուշացումը Ռուսաստանին՝ օդային տարածքների խախտումների հետ կապված

Միջադեպը տեղի է ունեցել մոտ 20 ռուսական անօդաչու թռչող սարքերի՝ Լեհաստանի օդային տարածք մուտք գործելուց մեկ շաբաթ անց, ինչը ստիպել էր ՆԱՏՕ-ի ինքնաթիռներին խոցել դրանցից մի քանիսը։

«Ռուսաստանը կրում է այս գործողությունների լիարժեք պատասխանատվությունը, որոնք սրում են իրավիճակը։ Կարող են սխալ հաշվարկներ անել և վտանգել կյանքեր։ Դրանք պետք է դադարեցվեն։ Ռուսաստանը չպետք է կասկածի, ՆԱՏՕ-ն և դաշնակիցները, միջազգային իրավունքի համաձայն, կօգտագործեն բոլոր անհրաժեշտ ռազմական և ոչ ռազմական գործիքները՝ պաշտպանվելու և բոլոր ուղղություններից եկող սպառնալիքները կանխելու համար։ Մենք կշարունակենք արձագանքել մեր ընտրած ձևով, կարգով և տարածքում»,- ասվում է դաշինքի Հյուսիսատլանտյան խորհրդի հայտարարության մեջ։

Երեքշաբթի Դաշինքի անդամ 32 երկրների դեսպաններից կազմված Հյուսիսատլանտյան խորհրդի նիստը հրավիրվել էր Էստոնիայի կողմից՝ համաձայն ՆԱՏՕ-ի հիմնադիր պայմանագրի 4-րդ հոդվածի։ Ըստ հրապարակման՝ դաշնակիցները «կխորհրդակցեն միմյանց հետ, երբ նրանցից որևէ մեկի կարծիքով սպառնալիքի տակ հայտնվի դաշինքի անդամի տարածքային ամբողջականությունը, քաղաքական անկախությունը կամ անվտանգությունը»։

ՆԱՏՕ-ի 76-ամյա պատմության մեջ իններորդ անգամն է, որ այս հոդվածը կիրառվում է, և այդ դեպքերից երկուսը տեղի են ունեցել այս ամսվա ընթացքում՝ Լեհաստանի և Էստոնիայի շուրջ տեղի ունեցած միջադեպերին ի պատասխան։

«Ռուսաստանի այս և այլ անպատասխանատու գործողությունները չեն խանգարի դաշնակիցներին կատարել իրենց անսասան պարտավորությունները՝ աջակցելու Ուկրաինային, որի անվտանգությունը նպաստում է մեր անվտանգությանը՝ Ռուսաստանի դաժան և չհրահրված ագրեսիվ պատերազմի դեմ ինքնապաշտպանության իր անբաժանելի իրավունքն իրացնելու գործում»,- ասվում է ՆԱՏՕ-ի հայտարարության մեջ։