Բաքվից արձագանքում են Անկարային․ Ադրբեջանը հանուն Իսրայելի չի հրաժարվի «Եվրատեսիլ»-ին մասնակցելուց

Տեղեկություններն այն մասին, որ Ադրբեջանը կհրաժարվի «Եվրատեսիլ» երգի մրցույթին մասնակցությունից, եթե Իսրայելը չմասնակցի, չեն համապատասխանում իրականությանը։ Ադրբեջանական լրատվամիջոցների հաղորդմամբ՝ այս մասին այսօր հայտարարել է «Եվրատեսիլ»-ում ադրբեջանական պատվիրակության լրատվական ծառայության ղեկավար Թուրաբ Թեյմուրովը։

«Մեր մասնակցությունը կախված չէ որևէ երկրի ներկայացվածությունից։ Մենք չենք միջամտում քաղաքականությանը»,- նշել է նա։

Հավելենք, որ օրերս թուրքական Yeniakit-ը և մի շարք այլ լրատվամիջոցներ հայտնել էին, որ Ադրբեջանը հայտարարել է, թե՝ կհրաժարվի 2026 թվականի «Եվրատեսիլ» երգի մրցույթին մասնակցությունից, եթե Իսրայելին արգելեն մասնակցել։ Ըստ թուրքական աղբյուրների՝ Ադրբեջանը հայտնել է, որ այդ դեպքում կբոյկոտի մրցույթը։

Այս լուրերի տարածումից հետո ադրբեջանական իշխանամերձ լրատվամիջոցները գրել էին, որ թուրքական որոշ լրատվամիջոցների կողմից տարածված տեղեկությունն իրականությանը չի համապատասխանում։

Ըստ ադրբեջանական աղբյուրների՝ Դուբրովնիկում սեպտեմբերի 15-16-ը կայացած միջոցառման ժամանակ վեց երկրների՝ Իսպանիայի, Նիդերլանդների, Սլովենիայի, Իսլանդիայի, Իռլանդիայի և Բելգիայի հեռարձակողները պաշտոնապես հայտարարել են, որ կհրաժարվեն մրցույթից, եթե Իսրայելը մասնակցի դրան։ Նշվում է, որ միջոցառման ընթացքում այս հարցի վերաբերյալ Ադրբեջանը որևէ հայտարարություն կամ մեկնաբանություն չի արել։

Իսրայելի մասնակցության հարցը մասնակից երկրների կողմից կդրվի քվեարկության EBU-ի (Եվրոպական հեռարձակողների միություն) գլխավոր ժողովում, որը տեղի կունենա դեկտեմբերի 2-4-ը Ժնևում։

Կազմակերպիչները մրցույթից հրաժարվելու վերջնաժամկետը երկարաձգել են մինչև դեկտեմբերի 10-ը՝ առանց ֆինանսական տույժերի։

Հավելենք, որ 2026 թվականին «Եվրատեսիլ» երգ մրցույթը տեղի կունենա Ավստրիայի մայրաքաղաք Վիեննայում։

Թարգմանությունը՝ Էմմա Չոբանյանի