ԱԹՍ-ների պատճառով փակվել են Կոպենհագենի և Օսլոյի օդանավակայանները

Նորվեգիայի մայրաքաղաք Օսլոյի Գարդերմուեն օդանավակայանի օդային տարածքը փակվել է մոտակայքում անօդաչու թռչող սարքի հայտնաբերման պատճառով։ Այս մասին նորվեգական NRK հանրային հեռարձակողին հայտնել է Avinor ավիաընկերության խոսնակը, գրում է DW-ի ռուսական ծառայությունը։

Սեպտեմբերի 22-ի երեկոյան մի շարք ինքնաթիռներ վերաուղղորդվել են։ Սա առնչվել է նաև արդեն օդում գտնվող ինքնաթիռներին։ Օդանավակայանում հերթապահություն է իրականացնում ոստիկանությունը։

Փարիզից Օսլո մեկնող չվերթն ուղարկվել է Կոպենհագենից հարավ-արևելք գտնվող Կաստրուպ։ Ըստ ինքնաթիռում գտնվող NRK-ի թղթակցի՝ ինքնաթիռը սկզբում ուշացել է Փարիզում, բայց շարունակել է թռիչքը։

Կոպենհագենի օդանավակայանը սեպտեմբերի 22-ի երեկոյան նույնպես փակվել է՝ անօդաչու թռչող սարքերի ակտիվության պատճառով։ Ենթադրվում է, որ ներգրավված են եղել երկու կամ երեք անօդաչու թռչող սարքեր, սակայն հաղորդագրությունները հաստատված չեն, ասվում է հրապարակման մեջ։

Սկանդինավիայի ամենածանրաբեռնված՝ Կոպենհագենի օդանավակայանն այսօր առավոտյան վերսկսել է գործունեությունը․ մինչ այս, անօդաչու թռչող սարքերը գրեթե չորս ժամ խափանել էին բոլոր թռիչքներն ու վայրէջքները։ FlightRadar-ը X սոցիալական ցանցում հաղորդել է, որ շուրջ 50 չվերթ վերաուղղորդվել է։ Ոստիկանությունը հետաքննություն է անցկացնում։

Դանիայի և Նորվեգիայի իշխանությունները համագործակցելու են՝ պարզելու համար՝ արդյո՞ք կա կապ երկու միջադեպերի միջև։

Մինչ այս, մի շարք եվրոպական օդանավակայաններոի,, այդ թվում՝ Բեռլինի և Բրյուսելի, մի քանի օր շարունակ խափանումներ էին  հաքերային հարձակումների պատճառով։ Սեպտեմբերի 19-ի երեկոյան հարձակման էր ենթարկվել ավիատիեզերական տեխնոլոգիաների և ռազմական համակարգերի մշակման մասնագիտացված տեղեկատվական տեխնոլոգիաների մատակարար Collins Aerospace-ը: Ընկերությունը Բեռլինի, Բրյուսելի, Դուբլինի և Լոնդոնի Հիթրոուի օդանավակայաններում մատուցում է գրանցման և ուղևորների սպասարկման ծառայություններ:

Միաժամանակ, սեպտեմբերի 22-ի երեկոյան Ռուսաստանի Շերեմետևո միջազգային օդանավակայանը ժամանակավոր սահմանափակումներ է մտցրել «Գորգ» ծրագրի պատճառով: Մոսկվայի քաղաքապետ Սերգեյ Սոբյանինը հայտարարել է  սեպտեմբերի լույս 23-ի գիշերը 11 անօդաչու թռչող սարքերի ոչնչացման մասին:

Թարգմանությունը՝ Էմմա Չոբանյանի