20.08.2026 | 12:34
Նիկոլ Փաշինյանի ճեպազրույցը՝ ՈՒՂԻՂ
ՀՀ անկախության 34-րդ տարեդարձին նվիրված իր ելույթի ժամանակ Փաշինյանը ծնկի եկավ
Քաղաքականություն
21.09.2025 | 20:24
Վարչապետ Նիկոլ Փաշինյանը Արմավիրում է, որտեղ անցկացվում է ՀՀ անկախության 34-րդ տարեդարձին նվիրված «Ֆեստիվառը»։
Փաշինյանը ողջունեց ներկաներին և շնորհավորեց նրանց ՀՀ անկախության տարեդարձի առթիվ։ 1991 թվականի սեպտեմբերի 21-ից ի վեր պետությունը բազմաթիվ փորձությունների միջով է անցել, որոնց արդյունքում ժողովրդի՝ անկախության և պետականության գիտակցումը էականորեն ուժեղացել է։
«Անկախություն ձեռք բերելու պրոցեսը նման է գնացքի վագոնից ավտոմեքենայով ճանապարհը շարունակելուն։ Պետությունը նման է ավտոմեքենային, որն իր տիրոջը՝ ժողովրդին, կարող է տանել Ա կետից Բ կետը. մեր այսօրվա կետից կարող է տանել մեր ցանկացած հաջորդ կետը, բայց դրա համար կան մի քանի կարևոր պայմաններ։ Ինչպես յուրաքանչյուր ավտոմեքենա, մենք պետք է հոգ տանենք մեր պետության վիճակի մասին։ Մեր պետության փաստաթղթերը, ինչպես ավտոմեքենայի պարագայում, պետք է տեղին և կարգին լինեն։ Մենք պետք է իմանանք համաշխարհային երթևեկության կանոնները, որպեսզի ի վիճակի լինենք մեր պետության՝ մեր մեքենայի վարումով ճիշտ և շրջահայաց ձևով հասնել այն կետին, որի մասին երազում ենք, իսկ այդ կետն ազատությունն է, բարեկեցությունն է, անվտանգությունն է, խաղաղությունն է և երջանկությունն է։
․․․Ես այսօր՝ այս տոնական օրը, ուզում եմ շնորհակալություն հայտնել բոլորիդ՝ ՀՀ բոլոր քաղաքացիներին, բոլոր նահատակներին՝ ՀՀ անկախության, ազատության և ինքնիշխանության դիրքերում ամուր կանգնելու համար։ Շնորհակալ եմ բոլորիդ»,-նշեց Փաշինյանը։
Վարչապետը ընդգծեց, որ հայ ժողովուրդը արժանի է ապրել երջանիկ և բարեկեցիկ կյանքով․ «Մենք մեր սեփական ձեռքերով պետք է կառուցենք մեր երջանկությունը և բարեկեցությունը»։
Հարգելով ՀՀ անկախության համար իրենց կյանքը զոհած նահատակների հիշատակը՝ Փաշինյանը ծնկի իջավ․ «Փառք նահատակներին, և կեցցե՛ ՀՀ-ն»։
Այնուհետև, դիմելով ներկաներին՝ Փաշինյանը ասաց, որ իր վերջին խոսքերից հետո ներկաները պետք է երեք անգամ կրկնեն՝ «Կեցցե՛»։ Առաջին փորձը նա չստացված համարեց և խնդրեց կրկնել։ Երկրորդը ավելի լավ էր, սակայն Փաշինյանն ասաց՝ «կարող էր ավելի լավ լինել»։ Երրորդ փորձը հաջողված համարեց, այնուհետև շնորհակալություն հայտնեց և իջավ բեմից։
