ՌԴ ՊՆ-ն հայտնել է Լուգանսկում նոր տարածքների գրավման մասին․ Ուկրաինան հերքում է

Ուկրաինացի զինվորականները հերքում են, որ ռուսական բանակը գրավել է Լուգանսկի մարզի Սերեբրյանսկոյե անտառտնտեսությունը, ինչպես այսօր կեսօրին հայտարարել է ՌԴ Պաշտպանության նախարարությունը, գրում է BBC-ի ռուսական ծառայությունը։

«Սերեբրյանսկոյե անտառտնտեսային տարածքը չի գրավվել։ Ուկրաինայի պաշտպանության ուժերը քաջաբար պահպանում են այնտեղ դիրքերը»,- BBC-ի ուկրաինական ծառայությանն ասել է Դնեպրի ուժերի օպերատիվ-ռազմավարական խմբի մամուլի խոսնակ, փոխգնդապետ Ալեքսեյ Բելսկին։

Նա, միաժամանակ, հավելել է, որ այդ տարածքում իրավիճակը չափազանց լուրջ է։

Սերեբրյանսկոյե անտառտնտեսությունն անտառապատ տարածք է ինքնահռչակ Լուգանսկի Ժողովրդական Հանրապետությունում (ԼԺՀ), որը տարածվում է Հյուսիսային Դոնեց գետի երկայնքով։ Դրա արևմտյան սահմանը մոտավորապես համընկնում է Ուկրաինայի Լուգանսկի մարզի սահմանի հետ։

Մարտավարական առումով հարձակումն ուղղված է Յամպոլ փոքրիկ գյուղին։ Այս հարձակումը, իր հերթին, կարևոր է որպես Սլավյանսկ-Կրամատորսկ ուղղությամբ ավելի լայն առաջխաղացման փուլ, որը ռուսական բանակի հիմնական նպատակներից մեկն է 2022 թվականի գարնանից ի վեր։

Յամպոլ գյուղը գտնվում է Սևերսկ և Լիման քաղաքների միջև, որոնք վերահսկվում են ուկրաինական բանակի կողմից: Այս հարձակումը բաժանում է քաղաքները և կարող է պոտենցիալ սպառնալիք ներկայացնել երկուսի համար էլ։

Յամպոլից, որը դեռևս չի գրավվել ռուսական ուժերի կողմից, մինչև Սլավյանսկ հեռավորությունը մոտավորապես 20 կիլոմետր է: Ճանապարհին պետք է անցնել շատ դժվար ջրային խոչընդոտ՝ Սևերսկի Դոնեց գետը։

Սևերսկը և Լիմանը գտնվում են գյուղից մոտավորապես 10 կիլոմետր հեռավորության վրա, սակայն ռուսական ստորաբաժանումները դրանցից յուրաքանչյուրի ուղղությամբ առաջ են շարժվում նաև մյուս ուղղություններից։ Լրատվամիջոցը գրում է, որ  այս առաջխաղացման արագությունը դանդաղ է. ռուսական զորքերը մեկ ամսվա ընթացքում անտառում առաջ են շարժվել մոտավորապես նույն 10 կիլոմետրով։