29.04.2026 | 00:57
Չեմպիոնների լիգա․ ՊՍԺ-ն գերգոլառատ խաղում հաղթեց «Բավարիային». ՏԵՍԱՆՅՈՒԹ
«Զանգեզուրի միջանցքի» բացումը թյուրքական աշխարհը կբարձրացնի ռազմավարական դիրքի․ Թուրքիայի փոխնախագահ
Քաղաքականություն
19.09.2025 | 20:48
Թուրքիայի փոխնախագահ Ջևդեթ Յըլմազը նախօրեին Բիշքեկում կայացած Թյուրքական պետությունների կազմակերպության անդամ երկրների կառավարությունների ղեկավարների և փոխնախագահների հանդիպմանը խոսել է, այսպես կոչված, «Զանգեզուրի միջանցքից»։
«Հարավային Կովկասում Զանգեզուրի միջանցքի բացմամբ ի հայտ եկող նոր լոգիստիկ ցանցերը ոչ միայն թյուրքական աշխարհը կդնեն տարածաշրջանային առևտրի կենտրոնում, այլև կբարձրացնեն նրա՝ էներգետիկ անվտանգության առումով ռազմավարական դիրքը: Անդրկասպյան Արևելք-Արևմուտք միջին միջանցքը ռազմավարական նախագիծ է, որը կամրապնդի մատակարարման շղթաները, կդիվերսիֆիկացնի առևտուրը, կմեծացնի բարգավաճումն ու զբաղվածության հնարավորությունները, ինչպես նաև կամրապնդի մեր երկրների միջև եղբայրական հարաբերությունները»,- հայտարարել է Թուրքիայի փոխնախագահը։
Նա նշել է, որ Թուրքիան գտնվում է այդ երթուղու վրա և նպաստում է դրան իր լայնածավալ ենթակառուցվածքային ցանցով, մասնավորապես, Բաքու-Թբիլիսի-Կարս երկաթուղով։ Յըմազը շեշտել է՝ Թուրքիան կշարունակի աշխատել բոլոր գործընկերների հետ՝ այդ միջանցքն ավելի արդյունավետ դարձնելու համար, ինչը հնարավորություն կտա համաշխարհային առևտրի արագ և արդյունավետ զարգացմանը։
Հիշեցնենք, որ ավելի վաղ էլ Թուրքիայի առևտրի նախարար Օմեր Բոլաթն էր հայտարարել, թե «Զանգեզուրի միջանցքի բացմամբ հնարավոր կլինի թյուրքական աշխարհի աշխարհագրական ինտեգրումը և տնտեսական հարաբերությունների զարգացումը, կակտիվանա Միջին միջանցքը»։
Թարգմանությունը՝ Էմմա Չոբանյանի
