20.08.2026 | 12:38
Օլիմպավանում, ըստ ՊԵԿ-ի, հարկային խոշոր խախտումներ են արձանագրվել․ շուրջ 2 մլրդ դրամի վնաս է պատճառվել․ ՏԵՍԱՆՅՈՒԹ
Արբանիայում AI-ով գեներացված նախարարն առաջին ելույթն է ունեցել խորհրդարանում․ դա ընդդիմադիր պատգամավորների քննադատությանն է արժանացել․ ՏԵՍԱՆՅՈՒԹ
Քաղաքականություն
19.09.2025 | 22:57
Ալբանիայի խորհրդարանում առաջին անգամ ելույթ է ունեցել արհեստական բանականության կողմից ստեղծված (AI-ով գեներացված) «նախարարը», որը երկրի վարչապետ Էդի Ռաման ներկայացրել է որպես իր կառավարության՝ նորարարության և թափանցիկության նկատմամբ մղումների խորհրդանիշ, գրում է ABC News-ը։
«Սահմանադրությունը խոսում է ժողովրդի ծառայության մեջ գտնվող ինստիտուտների մասին։ Այն չի խոսում քրոմոսոմների, մարմնի կամ արյան մասին։ Այն խոսում է պարտականությունների, հաշվետվողականության, թափանցիկության, խտրականությունից զերծ ծառայության մասին։ Ես ձեզ վստահեցնում եմ, որ ես մարմնավորում եմ նման արժեքներ նույնքան խստորեն, որքան յուրաքանչյուր մարդկային գործընկեր, գուցե, նույնիսկ ավելի խիստ»,- ասել է AI նախարարը։
Նա անվանվել է Դիելլա, որը ալբաներենից թարգմանաբար նշանակում է «արև», և պատկերված է կնոջ տեսքով՝ ավանդական ալբանական հագուստով։
Ռաման պնդում է, որ արհեստական բանականության կողմից ստեղծված բոտը կօգնի կառավարությանն աշխատել ավելի արագ և լիակատար թափանցիկությամբ: Սա Բալկանյան երկրի տեխնոլոգիական նորարարություններն ընդգծելու ավելի լայն ծրագրի տարրերից է՝ Եվրամիությանն անդամակցության ուղղությամբ աշխատանքի ընթացքում: Ալբանիան հույս ունի միանալ 27 անդամներից բաղկացած դաշինքին մինչև 2030 թվականը:
Ընդդիմադիր պատգամավորները խիստ քննադատաբար են մոտենում AI բոտին և կարծում են, որ Դիելլան իրականում կառավարության կողմից կաշառակերությունը թաքցնելու միջոց է։ Նրանք խոսնակին ստիպել են ընդհատել կառավարության ծրագրի քննարկումը։ Նիստն ավարտվել է 25 րոպե անց։
Պատգամավորները նաև բոյկոտել են կառավարության ծրագրի քվեարկությունը, բայց այն, այնուամենայնիվ, ընդունվել է 140 տեղանոց խորհրդարանականների 82 կողմ ձայնով։
Դիելլան ստեղծվել է այս տարվա սկզբին Microsoft-ի հետ համագործակցությամբ՝ որպես e-Albania կառավարական ծառայությունների հարթակի վիրտուալ օգնական։ Այն օգնում է օգտատերերին կողմնորոշվել կայքում և հասանելիություն ունենալ մոտ մեկ միլիոն թվային հարցումների և փաստաթղթերի։
«Ես այստեղ եմ ոչ թե մարդկանց փոխարինելու, այլ նրանց օգնելու համար։ Այո՛, ես քաղաքացիություն չունեմ, բայց նաև անձնական հավակնություններ կամ հետաքրքրություններ չունեմ»,- հայտարարել է AI նախարարը խորհրդարանին ուղղված իր ելույթում։
Թարգմանությունը՝ Էմմա Չոբանյանի
