09.08.2026 | 13:13
Դաշտավանում ծեծկռտուք է եղել․ մասնակիցները հարվածել են քարերով, մահակներով և կռփազենքով
Կամչատկայի ափերի մոտ 7,8 մագնիտուդով երկրաշարժ է տեղի ունեցել
Քաղաքականություն
19.09.2025 | 10:35
Կամչատկայի ափերի մոտ ուժեղ երկրաշարժ է տեղի ունեցել։ ԱՄՆ երկրաբանական ծառայությունն այն գնահատել է 7,8 մագնիտուդ, գրում է Meduza-ն։
Երկրաշարժի էպիկենտրոնը գտնվել է Պետրոպավլովսկ-Կամչատկից մոտավորապես 100 կիլոմետր արևելք՝ 10 կիլոմետր խորության վրա։
Ռուսաստանի գիտությունների ակադեմիայի երկրաֆիզիկական ծառայությունը երկրաշարժի մագնիտուդը գնահատել է 7,4, նահանգապետ Վլադիմիր Սոլոդովը հայտարարել է, որ թարմացված տվյալների համաձայն՝ այն կազմել է 7,2 մագնիտուդ:
Ցունամիի մասին նախազգուշացում է տրվել Կամչատկայում և ԱՄՆ-ում: Մոսկվայի ժամանակով 4:30-ի սահմաններում արդեն Կամչատկայի երկրամասի իշխանությունները հայտարարել են, որ ցունամիի սպառնալիքը չեղյալ է հայտարարվել։
Իշխանությունները չեն հայտնել տուժողների կամ ավերածությունների մասին։
Հիշեցնենք, որ հուլիսի 30-ին Կամչատկայում տեղի էր ունեցել 8,8 մագնիտուդով երկրաշարժ։ Այն աշխարհում վերջին 14 տարվա ընթացքում տեղի ունեցած ամենաուժեղ երկրաշարժն էր և տարածաշրջանում ամենաուժեղը՝ 1952 թվականից ի վեր։ Ցունամիի վտանգի մասին նախազգուշացում էր տրվել ամբողջ Խաղաղօվկիանոսյան տարածաշրջանի համար, սակայն ալիքները չափավոր էին։ Ստորգետնյա ցնցումներից ոչ ոք չէր զոհվել, սակայն Կամչատկայի որոշ շենքեր վնասվել են։
Հուլիսի 30-ից ի վեր տարածաշրջանում տեղի են ունեցել մի քանի ավելի փոքր ուժգնությամբ երկրաշարժեր։ Դրանցից ամենաուժեղը սեպտեմբերի 13-ին տեղի ունեցած երկրաշարժն էր՝ 7,7 մագնիտուդով։
Թարգմանությունը՝ Էմմա Չոբանյանի
