Հռոմի պապը նշել է, որ Վատիկանը պատրաստ չէ Գազայի վրա Իսրայելի հարձակումը ցեղասպանություն որակել

Սուրբ Աթոռը պատրաստ չէ Իսրայելի կողմից Գազայում իրականացված արշավը ցեղասպանություն բնորոշել։ Հուլիսին տված, բայց այս հինգշաբթի հրապարակված հարցազրույցում այս մասին ասել է Հռոմի պապ Լևոն XIV-ը, գրում է Al Arabiya-ն՝ AFP-ին վկայակոչելով։

«Ցեղասպանություն բառն ավելի ու ավելի հաճախ է շրջանառվում»,- ասել է Հռոմի պապը ամերիկացի լրագրող Էլիզ Անն Ալենի հետ հարցազրույցում՝ «Պապ Լևոն XIV. համաշխարհային քաղաքացի, 21-րդ դարի միսիոներ» գրքի համար։

«Պաշտոնապես Սուրբ Աթոռը չի կարծում, որ մենք այս պահին կարող ենք որևէ հայտարարություն անել այդ մասին։ Կա  տեխնիկական սահմանում այն ​​մասին, թե ինչ կարող է լինել ցեղասպանությունը, բայց ավելի ու ավելի շատ մարդիկ են բարձրացնում այս հարցը»,- ասել է նա։

ՄԱԿ-ի քննիչները երեքշաբթի Իսրայելին մեղադրել էին Գազայում ցեղասպանություն կատարելու մեջ՝ «պաղեստինցիներին ոչնչացնելու» նպատակով, մեղադրելով Իսրայելի վարչապետին և այլ բարձրաստիճան պաշտոնյաներին։ Սա առաջին դեպքն է, երբ ՄԱԿ-ի կողմից լիազորված քննչական մարմինը եզրակացրել է, որ երկիրը ցեղասպանություն է իրականացնում։

Հուլիսյան հարցազրույցում ԱՄՆ-ում ծնված Հռոմի պապն ասել է, որ հիասթափեցնող է, որ նույնիսկ Միացյալ Նահանգները դժվարանում է ճնշում գործադրել Իսրայելի վրա՝ մեղմելու Գազայում տառապանքները, որտեղ պաղեստինցիները սովի են մատնված՝ ըստ ՄԱԿ-ի տվյալների։

«Նույնիսկ Միացյալ Նահանգների կառավարության կողմից, վերջերս նախագահ Թրամփի կողմից արված որոշ շատ հստակ հայտարարություններից հետո, դեռևս հստակ արձագանք չի եղել Գազայի ժողովրդի, անմեղ մարդկանց տառապանքները մեղմելու արդյունավետ եղանակներ գտնելու առումով, և դա, ակնհայտորեն, մեծ մտահոգություն է առաջացնում»,- ասել է նա։

Վատիկանի պաշտոնական դիրքորոշմանը հակառակ՝ Հռոմի նախորդ՝ Ֆրանցիսկոս պապը կասկածի տակ էր դրել՝ արդյո՞ք Իսրայելի կոշտ ռազմական արձագանքը Գազայի հատվածում ցեղասպանություն է։

Պատերազմը Գազայում սկսվել է ՀԱՄԱՍ-ի կողմից Իսրայելի տարածքի վրա 2023 թվականի հոկտեմբերի 7-ին իրականացված հարձակումից հետո, որի հետևանքով զոհվել է 1219 մարդ։ Գազայի առողջապահության նախարարության տվյալներով՝ Իսրայելի պատասխան արշավի հետևանքով Գազայի գրեթե ամբողջ բնակչությունը տեղահանվել է, զոհվել է ավելի քան 65,000 մարդ։

Չորեքշաբթի Հռոմի պապը համերաշխություն էր հայտնել Գազայի ժողովրդին՝ նշելով, որ խաղաղ բնակիչները «կրկին» ստիպված են եղել լքել իրենց հողերը և ապրում են «անընդունելի պայմաններում»։

Թարգմանությունը՝ Էմմա Չոբանյանի