16.02.2026 | 20:40
Բարձր եմ գնահատում Լիտվայի աջակցությունը Հայաստանին. ՀՀ նախագահ
Ուկրաինական ԱԹՍ-ները հարվածել են Բաշկորտոստանում գտնվող ՌԴ խոշորագույն նավթաքիմիական համալիրներից մեկին․ ՏԵՍԱՆՅՈՒԹ
Քաղաքականություն
18.09.2025 | 16:33
ՌԴ Բաշկորտոստանի «Գազպրոմ Նեֆտեխիմ Սալավատ» գործարանում անօդաչու թռչող սարքի հարձակումից հետո հրդեհ է բռնկվել։ Այս մասին հայտնել է հանրապետության ղեկավար Ռադի Խաբիրովը, գրում է Meduza-ն։
Հարձակմանը մասնակցել են ինքնաթիռային տիպի երկու ԱԹՍ-ներ։ Խաբիրովը հարձակումն անվանել է «ահաբեկչական», բայց չի նշել, թե որտեղից են արձակվել անօդաչու թռչող սարքերը։ Նա ասել է, որ տուժածներ չկան։ Խաբիրովը հավելել է, որ օբյեկտի անվտանգության աշխատակիցները կրակ են բացել՝ խոստանալով մանրամասները տրամադրել «մի փոքր ավելի ուշ»։
Ուկրաինական տելեգրամ ալիքները, մինչդեռ, ավելի վաղ հայտնել էին «Գազպրոմ Նեֆտեխիմ Սալավատ»-ի վրա հարձակման մասին: Exilenova+ տելեգրամ ալիքի տվյալներով՝ հարված է հասցվել գործարանի նավթավերամշակման հիմնական բլոկին։
«Գազպրոմ Նեֆտեխիմ Սալավատ»-ը Ռուսաստանի խոշորագույն նավթաքիմիական համալիրներից մեկն է։ Այն իրականացնում է ածխաջրածնային հումքի վերամշակման ամբողջական ցիկլ և արտադրում է բենզին, դիզելային վառելիք, մազութ, բիտում, պոլիէթիլեն, ստիրոլ և այլն։ Համալիրը ներառում է երեք գործարան՝ նավթավերամշակման, գազաքիմիական և «Մոնոմեր» գազաքիմիական գործարանը։
Ուկրաինացի զինվորականներն իրենց հերթին հայտարարել են Վոլգոգրադի նավթավերամշակման գործարանին հարվածելու մասին։
«2025 թվականի սեպտեմբերի լույս 18-ի գիշերը հատուկ նշանակության ուժերի ստորաբաժանումները հարված են հասցրել ՌԴ Վոլգոգրադի մարզում գտնվող Վոլգոգրադի նավթավերամշակման գործարանին»,- ասվում է հայտարարության մեջ։
Նախնական տեղեկություններով՝ նավթավերամշակման գործարանի աշխատանքը դադարեցվել է։
Վոլգոգրադի մարզի նահանգապետ Անդրեյ Բոչարովն այսօր առավոտյան հայտարարել էր, որ ՌԴ Պաշտպանության նախարարությունը գիշերը հետ է մղել տարածաշրջանի վրա անօդաչու թռչող սարքերի զանգվածային հարձակումը։
«Վոլգոգրադի Կրասնոարմեյսկի շրջանում անօդաչու թռչող սարքի բեկորների ընկնելու հետևանքով կոտրվել են պատուհաններ և վնասվել երկու մասնավոր տների տանիքներ»,- գրել է նահանգապետը։
Նա վստահեցրել է, որ հարձակման հետևանքով տուժածներ չկան։
Ռուսաստանի ՊՆ-ն էլ նշել է, որ 11 անօդաչու թռչող սարք է հարձակվել Վոլգոգրադի մարզի վրա։
Թարգմանությունը՝ Էմմա Չոբանյանի
