07.09.2026 | 16:58
Երևանի գերեզմանատան հարակից տարածքում «ԱԿ-47» ինքնաձիգ և փամփուշտներ են հայտնաբերվել
Սիրիայի ԱԳ նախարարը 25 տարվա մեջ առաջին անգամ ԱՄՆ կայցելի․ քննարկվելու է պատժամիջոցների վերացման հարցը
Քաղաքականություն
18.09.2025 | 12:15
Սիրիայի արտաքին գործերի նախարար Ասաադ ալ-Շիբանին այս շաբաթ Վաշինգտոնում կհանդիպի ամերիկացի օրենսդիրների հետ՝ քննարկելու Դամասկոսի նկատմամբ ԱՄՆ-ի սահմանած մնացյած պատժամիջոցների վերացումը: Այս մասին հայտնել է սենատոր Լինդսի Գրեհեմը, գրում է Reuters-ը։
Շիբանիի այցը, որը Սիրիայի արտաքին գործերի նախարարի առաջին այցն է Վաշինգտոն ավելի քան 25 տարվա ընթացքում, տեղի է ունենում Սիրիայի նախագահ Ահմեդ ալ-Շարաայի՝ չորեքշաբթի արված այն հայտարարությանը զուգահեռ, որ ԱՄՆ-ի դաշնակից Իսրայելի և Սիրիայի միջև անվտանգության համաձայնագրի հասնելու բանակցությունները կարող են արդյունքների հանգեցնել «առաջիկա օրերին»։
Գրեհեմն Axios-ին հայտնել է, որ սենատորները հինգշաբթի կհանդիպեն Շիբանիի հետ՝ քննարկելու օրենսդրությամբ թույլատրված որոշակի պատժամիջոցների, այդ թվում՝ Caesar Act-ի մշտական վերացման հարցը։ Սենատորն ասել է, որ ինքը կաջակցի այդ պատժամիջոցների չեղարկմանը, եթե Սիրիան պաշտոնապես անցնի Իսրայելի հետ նոր անվտանգության համաձայնագրի և միանա ԻԼԻՊ-ի դեմ կոալիցիային։
Axios-ը գրում է, որ Շիբանին կհանդիպի նաև պետքարտուղար Մարկո Ռուբիոյի հետ։
Սիրիան և Իսրայելը բանակցություններ են վարում համաձայնության հասնելու համար, որը, Դամասկոսի կարծիքով, կապահովի Իսրայելի օդային հարվածների դադարեցումը և Սիրիայի հարավից իսրայելական զորքերի դուրսբերումը։
Այս շաբաթ Reuters-ը հաղորդել էր, որ Վաշինգտոնը ճնշում է գործադրում Սիրիայի վրա՝ համաձայնության հասնելու համար, մինչև Նյու Յորքում ՄԱԿ-ի Գլխավոր վեհաժողովում հաջորդ շաբաթ համաշխարհային առաջնորդների հավաքվելը։
Շարաան հերքում է, որ ԱՄՆ-ը որևէ ճնշում է գործադրում Սիրիայի վրա՝ պնդելով, որ ԱՄՆ-ը միջնորդի դեր է խաղում։ Նա ասել է, որ Իսրայելը Սիրիայի վրա ավելի քան 1000 հարված է հասցրել և ավելի քան 400 ցամաքային ներխուժում է իրականացրել դեկտեմբերի 8-ից ի վեր, երբ իր գլխավորած ապստամբների հարձակումը տապալել էր Սիրիայի նախկին առաջնորդ Բաշար ալ-Ասադին։ Սա տեղի է ունեցել 13 տարվա քաղաքացիական պատերազմից հետո։
ԱՄՆ նախագահ Դոնալդ Թրամփն այս տարեսկզբին հայտարարել էր Սիրիայի նկատմամբ Վաշինգտոնի որոշ կարևոր պատժամիջոցների վերացման մասին։
Հավելենք, որ լրատվամիջոցները հայտնել էին նաև Բաքվում Իսրայելի և Սիրիայի ներկայացուցիչների միջև անվտանգության հարցերով հանդիպում անցկացնելու ծրագրերի մասին։
Թարգմանությունը՝ Էմմա Չոբանյանի
