Պուտինի մտերիմ Դմիտրի Կոզակը հրաժարական է տվել ՌԴ նախագահի աշխատակազմի ղեկավարի տեղակալի պաշտոնից

ՌԴ նախագահի աշխատակազմի ղեկավարի տեղակալ Դմիտրի Կոզակը հրաժարականի դիմում է ներկայացրել։ Այս մասին  հայտնել է РБК-ն՝ հղում անելով պաշտոնյայի որոշմանը ծանոթ երկու աղբյուրների, փոխանցում է DW-ի ռուսական ծառայությունը:

Աղբյուրներից մեկի հաղորդմամբ՝ Կոզակը «քննարկում է բիզնեսով զբաղվելու տարբեր առաջարկներ»։

Դմիտրի Կոզակը Ռուսաստանի նախագահ Վլադիմիր Պուտինի վաղեմի մտերիմներից է։ Նրանք միասին աշխատել են Սանկտ Պետերբուրգի քաղաքապետարանում 1990 թվականներին։ Երբ Պուտինը 2000 թվականին դարձավ նախագահ, Կոզակը նախ դարձավ նախագահի աշխատակազմի ղեկավարի տեղակալ, ապա՝ նախագահի աշխատակազմի ղեկավարի առաջին տեղակալ։ 2004 թվականին նա միացել է կառավարությանը, իսկ 2020 թվականին վերադարձել նախագահի աշխատակազմ։

Այս տարվա օգոստոսին The New York Times-ը, հղում անելով աղբյուրներին, հաղորդել էր, որ Դմիտրի Կոզակը փորձել է Պուտինին տարհամոզել 2022 թվականին Ուկրաինա լայնածավալ ներխուժումից, իսկ 2025 թվականին առաջարկել է դադարեցնել Ուկրաինայում ռազմական գործողությունները և խաղաղության բանակցություններ սկսել։

Ըստ Reuters-ի՝ լայնածավալ պատերազմի սկզբում Կոզակը նախնական համաձայնագիր է պատրաստել Ուկրաինայի հետ կնքելու համար, որը ենթադրում էր, որ Կիևը չի միանա ՆԱՏՕ-ին, սակայն Վլադիմիր Պուտինը մերժել է համաձայնագիրը և շարունակել ռազմական արշավը։

«Փետրվարի 24-ից հետո Կոզակը քարտ-բլանշ էր ստացել. նրան կանաչ լույս էին տվել, և նա գործարք էր կնքել։ Նա վերադարձել էր դրանով և նրանից պահանջեցին հեռու մնալ։ Ամեն ինչ չեղարկվել էր։ Պուտինն ընթացքում փոխել էր ծրագիրը»,- ասել է գործակալության աղբյուրներից մեկը։

Թարգմանությունը՝ Էմմա Չոբանյանի