Արարատն ամենագեղեցիկը երևում է ՀՀ-ից, Արարատ լեռը որևէ մեկը որևէ մեկից չի կարող խլել․ Հովհաննիսյան․ ՏԵՍԱՆՅՈՒԹ

«Կա Հայաստանի Հանրապետություն, որն ունի միջազգայինորեն ճանաչված հստակ սահմաններ և իր սահմանների ներսում ունի պետական սիմվոլներ, ունի պետականություն։ Մեր յուրաքանչյուր գործողություն՝ լինի դա կնիքի տեսքով կամ բանավոր խոսքով, պետք է արտահայտի ՀՀ պետականությունն ու պետական սիմվոլները։ Զարմանալի չէ, որ ընդդիմությունը նման տեքստեր է ասում, թե մեզանից խլում են մեր ինքնությունը։ ՀՀ քաղաքացու ինքնությունը որևէ մեկը չի կարող խլել»,- Factor TV-ի հետ զրույցում ասաց ԱԺ «Քաղաքացիական պայմանագիր» խմբակցության քարտուղար Արթուր Հովհաննիսյանը։
Իշխող ուժի ներկայացուցչի խոսքով՝ ՀՀ կնիքներն ու խորհրդանիշները պետք է արտահայտեն մեր երկրի ներսում գտնվող սիմվոլները։ ՔՊ խմբակցության քարտուղարի պնդմամբ՝ սահմանահատումների կնիքից Արարատ լեռան պատկերը հեռացնելը որևէ մեկի ցանկությամբ չի արվել, այն բխում է խաղաղության օրակարգից։
«Արարատ լեռան պատկերը չի կարող ՀՀ-ի համար որևէ համատեքստում սպառնալիք ներկայացնել։ Արարատ լեռը մենք սիրելու ենք, հմայվելու ենք, նկարելու ենք ու կախելու ենք մեր պատերից։ Այն մեր պատմական հիշողության սիմվոլն է»,– նշեց նա և հավելեց․ «Արարատն ամենագեղեցիկը երևում է ՀՀ-ից, Արարատ լեռը որևէ մեկը որևէ մեկից չի կարող խլել»։
Հիշեցնենք, որ կառավարության որոշմամբ՝ նոյեմբերի 1-ից ՀՀ-ից սահմանահատման կնիքի վրա չի լինելու Արարատ լեռան պատկերը, ինչը բուռն քննադատությունների ալիք է բարձրացրել։

Մանրամասները՝ տեսանյութում։
Մանյա Պողոսյան