11.03.2026 | 18:36
Պարալիմպիկ խաղեր․ Գարիկ Մելքոնյանը 15-րդն է
Պետդուման հավանություն է տվել խոշտանգումների կանխարգելման Եվրոպական կոնվենցիայից ՌԴ-ի դուրս գալուն
Քաղաքականություն
17.09.2025 | 16:00
Ռուսաստանի Պետդուման չեղյալ է հայտարարել «Խոշտանգումների և անմարդկային վերաբերմունքի կամ պատժի կանխարգելման մասին» Եվրոպական կոնվենցիան, ինչպես նաև դրա երկու արձանագրությունները, հաղորդում է Meduza-ն։
ՌԴ նախագահ Վլադիմիր Պուտինը խորհրդարան էր ներկայացրել Կոնվենցիան չեղյալ համարելու մասին օրինագիծ։ Բացատրական գրառման մեջ նշվում էր, որ Կոնվենցիայից դուրս գալու որոշումը պայմանավորված է նրանով, որ «Եվրոպայի խորհուրդն արգելափակում է է Ռուսաստանի Դաշնությունից նոր անդամի ընտրությանը Խոշտանգումների կանխարգելման եվրոպական կոմիտեում», և որ Մոսկվան չի կարողանում լիարժեք մասնակցել այդ մոնիթորինգի մեխանիզմի աշխատանքներին 2023 թվականի դեկտեմբերից սկսած։
«Այս միջազգային պայմանագրի չեղյալ հայտարարումը չի նվազեցնի Ռուսաստանի Դաշնությունում խոշտանգումների կանխարգելման միջազգային իրավական երաշխիքների մակարդակը, քանի որ այն շարունակում է մնալ մի շարք հիմնական պայմանագրերի և արձանագրությունների կողմ, որոնք ապահովում են ինչպես խոշտանգումներից պաշտպանության նյութաիրավական չափանիշներ, այնպես էլ այդ չափանիշների պահպանման մոնիթորինգի մեխանիզմներ»,- լրագրողներին ասել է Պետդումայի առաջին փոխխոսնակ Ալեքսանդր Ժուկովը։
«Խոշտանգումների կանխարգելման մասին» Եվրոպական կոնվենցիան (CPR) ընդունվել է Եվրոպայի խորհրդի կողմից 1987 թվականին։ Ռուսաստանը վավերացրել է այն 1996 թվականին, երբ դարձել է Խորհրդի անդամ։ Ռուսաստանի կառավարությունն օգոստոսի վերջին պատրաստել էր կոնվենցիայից դուրս գալու առաջարկ։
Իրավապաշտպան «Первый отдел» նախագծի համաձայն՝ կոնվենցիայից դուրս գալուց հետո Ռուսաստանն այլևս պարտավոր չի լինի թույլ տալ միջազգային տեսուչներին մուտք գործել իր բանտեր, իսկ ռուս բանտարկյալներն այլևս չեն կարողանա բողոքներ ներկայացնել Խոշտանգումների կանխարգելման Եվրոպական կոմիտե։
Թարգմանությունը՝ Էմմա Չոբանյանի
