Վրաստանը մարել է ՌԴ-ին, Հայաստանին, Ադրբեջանին ունեցած պարտքը

2025 թվականի սեպտեմբերի 1-ի դրությամբ՝ Վրաստանը լիովին մարել է իր արտաքին պարտքը Ռուսաստանին և Փարիզի ակումբի վեց այլ վարկատու երկրներին՝ 2004 թվականի պարտքի վերակառուցման համաձայնագրի շրջանակում։ Այս մասին հայտնել է Վրաստանի ֆինանսների նախարարությունը, գրում է Ինտերֆաքսը։

Ռուսաստանից բացի՝ Վրաստանը մարվել է նաև Ադրբեջանի, Թուրքիայի, Ղազախստանի, Հայաստանի, Իրանի և Նիդերլանդների պարտքերը։ Օգոստոսի 1-ի դրությամբ՝ այս երկրների նկատմամբ չմարված ընդհանուր պարտքը կազմել է 7,32 միլիոն դոլար, այդ թվում՝ Ռուսաստանինը՝ 4 միլիոն դոլար։

Մարումները ներառել են 1999 թվականից առաջ վերցված 160 միլիոն դոլարի պարտք, 1999-ից մինչև 2004 թվականի մայիսը կուտակված պարտավորությունների տոկոսագումարները և 2004-2006 թվականներին մարման ենթակա պարտքերը՝ համաձայն նախկինում հաստատված ժամանակացույցի: Վերակառուցումն իրականացվել է 2004 թվականի հունիսի 1-ից մինչև 2006 թվականի դեկտեմբերի 1-ը, մարման ժամանակացույցով նախատեսված վճարումները նախատեսված էին 20 տարվա ընթացքում: Վերակառուցման համաձայնագիրը կնքվել է Արժույթի միջազգային հիմնադրամի կողմից Վրաստանի օգնության ծրագրի 2004 թվականի հաստատումից հետո:

Վրաստանի Ֆինանսների նախարարության համաձայն՝ վճարումների ընդհանուր գումարը գերազանցել է 225 միլիոն դոլարը։

2025 թվականի սեպտեմբերի 1-ի դրությամբ՝ Վրաստանի արտաքին պետական ​​պարտքը կազմել է 9,09 միլիարդ դոլար՝ տարեսկզբից աճելով 5,8%-ով։ Երկրի արտաքին պետական ​​պարտքի արժութային կառուցվածքում գրեթե 70%-ը եվրոյով է։

Թարգմանությունը՝ Էմմա Չոբանյանի