Թբիլիսին ռազմավարական գործընկերություն ունի երեք հարևանների՝ Ադրբեջանի, Հայաստանի և Թուրքիայի հետ․ Վրաստանի ԱԳ նախարար

Երբ խոսում ենք համաշխարհային անվտանգության մասին, նախևառաջ, պետք է սկսենք խոսել մեր հարևանների հետ հարաբերությունների մասին։ Մեր հարևանների հետ հարաբերությունները մեզ համար գերակա խնդիր են։ Այս մասին հայտարարել է Վրաստանի ԱԳ նախարար Մակա Բոճորիշվիլին վրացական Առաջին ալիքի եթերում։

«Վրաստանը ռազմավարական գործընկերություն ունի երեք հարևանների՝ Ադրբեջանի, Հայաստանի և Թուրքիայի հետ։ Երեք երկրների հետ հարաբերություններն էլ մեզ համար շատ արժեքավոր են։ Հիշում եք, որ Արտաքին գործերի նախարարության նախաձեռնությամբ Թբիլիսին էր այն վայրը, որտեղ տեղի ունեցավ Ադրբեջանի, Վրաստանի և Հայաստանի արտաքին գործերի նախարարությունների միջև առաջին հանդիպումը։ Դա շատ հետաքրքիր առաջին հանդիպում էր։ Վստահ եմ, որ այս ձևաչափով, և ոչ միայն այս ձևաչափով, մեր հարաբերությունները կզարգանան։ Մենք շարունակում ենք աշխատել, որպեսզի տարածաշրջանի համար կարևոր հարցերը, տարածաշրջանի անվտանգության համար կարևոր հարցերը քննարկվեն մեր կողմից, և մենք մասնակից լինենք այս գործընթացին»,- ասել է նա։

Վրաստանի ԱԳ նախարարը նաև նշել է, որ մի շարք այցելություններ են տեղի ունեցել Թուրքիա, և Անկարայի հետ  հարաբերությունները նույնպես շատ կարևոր են Թբիլիսիի համար, Թուրքիան տարածաշրջանում կարևոր խաղացող և կարևոր գործընկեր է։

Նրա խոսքով՝ Վրաստանը մի շարք կարևոր նախագծեր է իրականացրել Ադրբեջանի և Թուրքիայի հետ եռակողմ համագործակցության ձևաչափով, ինչն ապացուցում է, որ երկրները բարիդրացիական, բարեկամական հարաբերությունների միջոցով կարող են օգտակար նախագծեր իրականացնել ոչ միայն իրենց երկրների, այլև ավելի լայն տարածաշրջանի համար։

«Սա հաստատում է, որ մենք ունենք ներուժ իրականացնելու մեր երկրների համար օգտակար նախագծեր՝ բարիդրացիական, բարեկամական հարաբերությունների միջոցով, ինչը կարևոր է ամբողջ տարածաշրջանի համար։ Այս տարածաշրջանն արդեն ներառում է Կենտրոնական Ասիայի և Եվրոպայի երկրները, որոնց համար կարևոր են նաև մեր տարածաշրջանի անվտանգությունն ու համագործակցությունը»,- հայտարարել է Բոճորիշվիլին։

Թարգմանությունը՝ Էմմա Չոբանյանի