29.04.2026 | 17:01
ՄԱԿ-ը հայտնում է, որ Իրանում պատերազմի սկզբից ի վեր մահապատժի է ենթարկվել առնվազն 21 մարդ, ձերբակալվել՝ 4000-ը
Թրամփի լուսանկար Էփշթեյնի հետ՝ Վինձորի ամրոցի պատին․ ԱՄՆ նախագահին Բրիտանիայում դիմավորել են թագավորական պատիվներով՝ բողոքի ակցիաների ուղեկցությամբ
17.09.2025 | 12:34
ԱՄՆ նախագահ Դոնալդ Թրամփը ժամանել է Մեծ Բրիտանիա՝ աննախադեպ երկրորդ պետական այցով։ Բրիատանական կառավարությունը թագավորական կարմիր գորգով է դիմավորել Սպիտակ տան ղեկավարին։
«Այստեղ շատ բաներ են ջերմացնում իմ սիրտը։ Սա շատ յուրահատուկ վայր է»,- լրագրողներին ասել է Թրամփը ԱՄՆ առաջին տիկին Մելանյա Թրամփի հետ ժամանելուց հետո։
Չարլզ 3-րդ թագավորն այսօր կհյուրընկալի Թրամփին Վինձորի ամրոցում՝ շքեղ խնջույքի և կառքով զբոսանքի համար, իսկ հինգշաբթի Թրամփը կհանդիպի Մեծ Բրիտանիայի վարչապետ Քիր Սթարմերի հետ նրա ամառանոցում, գրում է France 24-ը։
Որպես սպասվող շքեղության և հանդիսավորության նշան՝ Թրամփին դիմավորել է պատվո պահակախումբը, երբ նրանք Լոնդոնի մոտ գտնվող Սթանսթեդ օդանավակայանում իջել են Air Force One ինքնաթիռից։ Նա կիջևանի Լոնդոնում ԱՄՆ դեսպանի նստավայր Ուինֆիլդ Հաուսում։
«Վաղը շատ կարևոր օր է լինելու»,- ասել է նա։
Դոնալդ Թրամփն ԱՄՆ առաջին նախագահն է, որին հրավիրել են Մեծ Բրիտանիա երկու պետական այցով։ Նախկինում նրան հյուրընկալել է Եղիսաբեթ II թագուհին նախագահության առաջին ժամկետի ընթացքում՝ 2019 թվականին, քանի որ Մեծ Բրիտանիան ձգտում է պահպանել, այսպես կոչված, հատուկ հարաբերությունները։
Թրամփի այցը տեղի կունենա ամբողջությամբ փակ դռների հետևում և անվտանգության խստացված միջոցառումների պայմաններում։
Չորեքշաբթի Լոնդոնում Թրամփի դեմ մեծ ցույց է կազմակերպվել, մինչդեռ երեքշաբթի ուշ երեկոյան ցուցարարները Թրամփի և դատապարտված սեռական հանցագործ Ջեֆրի Էփշթեյնի պատկերները ցուցադրել են Վինձորի ամրոցի աշտարակների վրա։
Թեմզայի հովտի ոստիկանությունը սեպտեմբերի 16-ի երեկոյան ձերբակալել է չորս անձի, որոնք ԱՄՆ նախագահ Դոնալդ Թրամփի և Ջեֆրի Էփշթեյնի՝ 1990-ականներին կադրերը ցուցադրել են Վինձորի ամրոցի պատին։
Ըստ հրապարակման՝ Էփշտեյնի սկանդալի ստվերը շաբաթներ շարունակ կախված է Թրամփի վրա, այն բանից հետո, երբ նրա վարչակազմը հրաժարվել է այս հարցի վերաբերյալ մանրամասներ ներկայացնել։ Այն նաև ներքաշել է Մեծ Բրիտանիայի վարչապետ Քիր Սթարմերին, որն այցի նախօրեին աշխատանքից ազատել էր Վաշինգտոնում իր դեսպան Փիթեր Մանդելսոնին՝ Էփշթեյնին ուղղված էլեկտրոնային նամակների պատճառով։
ԱՄՆ նախագահի այցը համընկնում է Մեծ Բրիտանիայում մի քանի ներդրումային հայտարարությունների հետ, որոնցից վերջինը Microsoft-ի խոստումն է՝ չորս տարվա ընթացքում 30 միլիարդ դոլար ծախսելու մասին։
Դաունինգ սթրիթը հայտարարել է, որ Թրամփի այցը երկրների միջև «անխախտ բարեկամությունը» կհասնի նոր բարձունքների։
Թարգմանությունը՝ Էմմա Չոբանյանի
