Թուրքիան արգելում է Ադրբեջանից տաքսու վարորդների մուտքը Իգդիր նահանգ․ թուրքական կողմը տասնյակ վարորդների է ձերբակալել

Gundelik Nakhchivan սոցիալական լրատվական էջը, որը լուսաբանում է Նախիջևանի իրադարձությունները, պնդում է, որ թուրքական իշխանություններն արդեն մի քանի շաբաթ է՝ արգելում են տաքսու վարորդներին ադրբեջանական անկլավից մուտք գործել Թուրքիա, գրում է OC Media-ն։

Ըստ լրատվականի՝ նոր կանոնը խախտող տաքսու վարորդները կտուգանվեն, իսկ նրանց մեքենաները կենթարկվեն 15-օրյա կալանքի։

Վարորդները Facebook-ի իրենց էջում հայտնել են, որ ոստիկանությունը մաքսատունն անցնելուց հետո 20 կիլոմետրանոց վերահսկողության գոտում կանգնեցնում է իրենց ստուգման համար։ Թուրք սահմանապահները տաքսու վարորդներին հարցնում են նրանց ուղևորների անուն-ազգանունները։

«Ստուգումը չանցած վարորդները տուգանվում են, իսկ նրանց մեքենաներն ուղարկվում են տուգանային հրապարակ»,- հայտնել է Gundelik Nakhchivan-ը։

Տաքսու վարորդներից Գյունդուզ Մամեդովը լրատվամիջոցին պատմել է, որ մի քանի օր առաջ տուգանվել է։

«Տարիներ շարունակ մենք ապրուստը վաստակել ենք Թուրքիա ուղևորների տեղափոխելով։ Վերջերս մեզ թույլատրվել է այնտեղ գնալ յուրաքանչյուր 15 օրը մեկ։ Հիմա թուրքական կողմը մեզ ամբողջությամբ զրկել է մեր ապրուստից»,- ասել է նա։

Մամեդովի խոսքով՝ թուրքական կողմը սա արել է Իգդիր-Դիլուջու անցակետի միջև ընկած հատվածում աշխատող միկրոավտոբուսների վարորդների բողոքի հիման վրա։

«Ասում են, որ Նախիջևանի վարորդները պետք է ուղևորին տանեն մաքսատուն, իսկ իրենք այնտեղից՝ Իգդիր»,- ասել է նա։

Մեկ այլ վարորդ՝ Նազիմ Մամեդովը նույնպես բախվել է այդ խնդրին։

«Նախկինում նման բան տեղի չէր ունենում. և՛ մենք, և՛ նրանք կարող էին ուղևորների տեղափոխել Նախիջևան-Իգդիր-Նախիջևան ուղղությամբ: Հիմա ասում են, որ Նախիջևանի տաքսու վարորդները չեն կարող ուղևորների տեղափոխել Թուրքիա: Բերեք նրանց Նախիջևանի մաքսատուն և այնտեղից հանձնեք թուրք տաքսիներին»,- ասել է նա։

Վարորդների խոսքով՝ Թուրքիայում ձերբակալվել են տասնյակ նախիջևանցի տաքսու վարորդներ:

Ադրբեջանի իշխանությունները չեն մեկնաբանել ադրբեջանցի տաքսու վարորդների համար Թուրքիա մուտք գործելու արգելքի մասին հաղորդումները։

Թուրքիայի և Նախիջևանի միջև սահմանները միակ ադրբեջանական ցամաքային սահմաններն են, որոնք բաց են անցման համար, քանի որ Բաքուն շարունակում է երկարաձգել սահմանների փակման ժամկետը՝ վկայակոչելով COVID-19 համավարակը։

Թարգմանությունը՝ Էմմա Չոբանյանի