23.06.2026 | 23:30
Հայաստանի մի շարք հասցեներում էլեկտրաէներգիայի անջատումներ կլինեն
ԵՄ 5 երկրներ հրաժարվել են սահմանափակել ռուսների համար վիզաների տրամադրումը․ ՌԴ-ի դեմ պատժամիջոցների 19-րդ փաթեթի հայտարարումը հետաձգվել է
Քաղաքականություն
16.09.2025 | 15:20
ԵՄ հինգ երկրներ վետո են դրել Ռուսաստանի քաղաքացիներին Շենգենյան վիզաների տրամադրումը սահմանափակելու առաջարկի վրա։ Այդ երկրներն են Հունաստանը, Իտալիան, Իսպանիան, Ֆրանսիան և Հունգարիան, հայտնում է հունական Pronews-ը, գրում է Meduza-ն։
Pronews-ը նշում է, որ Հունաստանի դեպքում, որը 2022 թվականից ի վեր առաջին անգամ արգելափակել է Ռուսաստանի վերաբերյալ ԵՄ որոշումը, սահմանափակումները կլինեն «աղետ», քանի որ Ռուսաստանից զբոսաշրջիկների հոսքը դեռևս մեծ է:
Միաժամանակ, Կիպրոսը չի օգտվել իր վետոյի իրավունքից, չնայած նրա բնակչության 10%-ը ռուսական անձնագիր ունի։
2022 թվականի սեպտեմբերին Եվրամիությունը դադարեցրել է ԵՄ-ի և Ռուսաստանի միջև վիզային ռեժիմի դյուրացման մասին համաձայնագիրը։ Արդյունքում, վիզայի վճարը 35-ից բարձրացել է մինչև 80 եվրոյի, իսկ դիմումների մշակման ժամանակահատվածն ավելացել է, սակայն որոշ երկրներ շարունակել են վիզաներ տրամադրել ռուսներին։ 2025 թվականի սեպտեմբերի սկզբին իտալական ANSA գործակալությունը հայտնել էր, որ Եվրահանձնաժողովը, Ռուսաստանի դեմ պատժամիջոցների հաջորդ՝ 19-րդ փաթեթը պատրաստելիս քննարկում է վիզա տրամադրող մարմինների համար ավելի խիստ առաջարկություններ մտցնելու հնարավորությունը, քանի որ ռուսները ամռանը սկսել են ավելի հաճախ մուտք գործել Եվրոպա: Մասնավորապես, Գերմանիան կոչ է արել լիովին պահպանել Եվրահանձնաժողովի առաջարկությունները 2022 թվականին վիզա տրամադրելու վերաբերյալ:
Politico-ն իր հերթին հայտնել է, որ Ռուսաստանի դեմ ԵՄ պատժամիջոցների նոր՝ 19-րդ փաթեթի հայտարարման ամսաթիվը անորոշ ժամկետով հետաձգվել է։
Ենթադրվում էր, որ այդ մասին հայտարարվելու է սեպտեմբերի 17-ին՝ չորեքշաբթի, սակայն հիմա այդ օրը չի դիտարկվում, հայտնում է լրատվամիջոցը՝ վկայակոչելով դիվանագիտական աղբյուրին ու եվրոպացի պաշտոնյային։ Նոր ամսաթիվ դեռևս չի նշանակվել։
Politico-ն նշում է, որ պատժամիջոցների հայտարարումը տեղափոխվել է այն պատճառով, որ ներկայում ԱՄՆ նախագահ Դոնալդ Թրամփն ու ԵՄ-ն փորձում են հասնել Սլովակիայից ու Հունգարիայից ռուսական նավթի գնման հրաժարման, սակայն դեռևս ապարդյուն։
Եթե Թրամփն ուզում է, որ ԵՄ երկրները դադարեն գնել ռուսական նավթ, բավարար է, որ նա հեռախոսով զանգահարի Սլովակիայի ու Հունգարիայի վարչապետներ Ռոբերտ Ֆիցոյին ու Վիկտոր Օրբանին, ասել է Politico-ի հետ զրուցած դիվանագետներից մեկը։
«Նրանք նրա ընկերներն են։ Նա կարող է պարզապես զանգահարել նրանց»,- նշել է դիվանագետը։
ԵՄ-ն ՌԴ-ի դեմ պատժամիջոցների 18-րդ փաթեթն ընդունել էր հուլիսին։
Թարգմանությունը՝ Էմմա Չոբանյանի
