Իսրայելը պետք է տնտեսապես ճնշվի. Էրդողանը Կատարում կոչ է արել պատժամիջոցներ սահմանել

Կատարում կայացած Իսլամական համագործակցության կազմակերպության և Արաբական լիգայի արտակարգ գագաթնաժողովի ժամանակ Թուրքիայի նախագահ Ռեջեփ Թայիփ Էրդողանը կոչ է արել Իսրայելի դեմ համապարփակ տնտեսական պատժամիջոցներ կիրառել՝ շեշտելով, որ Անկարան հրաժարվել է տարեկան 9.5 միլիարդ դոլարի առևտրից՝ Թել Ավիվի վրա ճնշում գործադրելու համար։

«Ես կարծում եմ, որ Իսրայելի վրա պետք է նաև տնտեսական ճնշում գործադրել։ Նախորդ փորձը ցույց է տալիս, որ նման քայլերը արդյունքներ են տալիս», – ասել է Էրդողանը գագաթնաժողովի մասնակիցներին։

Թուրքիայի նախագահը հայտարարել է, որ իր երկիրը վերջին մեկուկես տարվա ընթացքում դադարեցրել է Իսրայելի հետ բոլոր առևտրային գործարքները

«Այսպիսով, մենք կորցրել ենք տարեկան 9.5 միլիարդ դոլար», – հայտարարել է Էրդողանը՝ նշելով.

«Շատ կարևոր է նաև Միջազգային դատարանում բացված ցեղասպանության գործի աջակցությունը։  Մենք պետք է կարողանանք իրականացնել կոնկրետ քայլեր և մեխանիզմներ, որոնց միջոցով միասին կապահովենք տարածաշրջանի անվտանգությունը»։

Ըստ Էրդողանի`այս պահին կան բաներ, որոնք կարելի է անել Իսլամական համագործակցության կազմակերպության շրջանակներում։

Թուրքիայի նախագահը հայտարարել է, որ Իսրայելը տարածքային ընդլայնման է ձգտում որպես «Մեծ Իսրայել» գաղափարախոսության մաս։

Թուրքիայի առաջնորդը նշել է, որ Կատարի վրա Իսրայելի հարձակումը ցույց է տալիս, որ Իսրայելի «ավազակությունը» հասել է նոր մակարդակի և մեղադրել է երկրին տարածաշրջանը դիտավորյալ անկայունացնելու մեջ։

Էրդողանը նշել է, որ հավաքը պետք է միջազգային մակարդակով դիտարկվի որպես Կատարին անվերապահ աջակցության դրսևորում, որը հյուրընկալել է ՀԱՄԱՍ-ի առաջնորդներին և միջնորդ է հանդես եկել հրադադարի բանակցություններում։

«Թուրքիան միշտ կկանգնի մեր բարեկամ և եղբայրական դաշնակից Կատարի կողքին», – ասել է նա։

Նա Իսրայելի կառավարությունը բնութագրել է որպես «ահաբեկչական մտածելակերպի» մարմնացում, որը ծաղկում է քաոսի և արյունահեղության վրա։

Նա մեղադրել է Իսրայելի վարչապետ Բենիամին Նեթանյահուին Պաղեստինում կոտորածներ և ցեղասպանություն իրականացնելու մեջ՝ միաժամանակ անկայունություն տարածելով ամբողջ Մերձավոր Արևելքում։

Թուրքիայի նախագահը նաև առաջարկել է ընդլայնել իսլամական երկրների միջև համագործակցությունը պաշտպանության և զարգացման ոլորտներում։

Քննադատները, սակայն, մեղադրում են Էրդողանին Իսրայելի քննադատության մեջ երեսպաշտության մեջ՝ նշելով, որ իր մերձավոր գործընկերների հետ կապված ընկերությունները ամիսներով շարունակել են առևտուր անել Իսրայելի հետ, նույնիսկ այն ժամանակ, երբ նա հրապարակավ դատապարտել է երկիրը 2023 թվականի հոկտեմբերից հետո Գազայի հատվածում ռազմական արշավի համար։

Թարգմանությունը` Էմմա Չոբանյանի