31.05.2026 | 20:00
չԾխելու ՇԵՐՏԵՐԸ. ինչպես է շրջանցվում արդեն 6 տարի գործող օրենքը․ ՏԵՍԱՆՅՈւԹ
Քաղբանտարկյալ Նիկոլայ Ստատկևիչին, որն ազատ արձակվելուց հետո հրաժարվել էր լքել Բելառուսը, կալանավայր են վերադարձրել
Քաղաքականություն
15.09.2025 | 22:43
Բելառուսի նախագահի երբեմնի թեկնածու, 69-ամյա Նիկոլայ Ստատկևիչը, որը սեպտեմբերի 11-ին ազատ էր արձակվել այլ քաղբանտարկյալների հետ միասին և հրաժարվել էր մեկնել Լիտվա, չհաստատված տեղեկություններով, վերադարձվել է կալանավայր, գրում է DW-ի ռուսական ծառայությունը։
Նրա գտնվելու վայրի՝ մի քանի օր անհայտ մնալուց հետո, նրան տեսել են Գլուբոկոե քաղաքի ՔԿՀ-ում։ Այս մասին հաղորդել է «Наша Нiва»-ն՝ հղում անելով «հուսալի աղբյուրին»։
Ստատկևիչի մասին այլ տեղեկություններ չեն տրամադրվում, և այլ լրատվամիջոցներ նույնպես ոչինչ չեն հաղորդում Բելառուսի ղեկավար Ալեքսանդր Լուկաշենկոյի հակառակորդի ճակատագրի մասին: Ինչպես նշում են «Զերկալո»-ն և «Наша Нiва»-ն, Ստատկևիչը ազատ արձակվելուց առաջ մեկուսացված է եղել Վիտեբսկի մարզի Գլուբոկոյեի ուղղիչ գաղութում։
Միևնույն ժամանակ, քաղաքական գործչի կինը՝ Մարինա Ադամովիչը, հայտարարել է, որ Գլուբոկոյեի թիվ 13 ուղղիչ գաղութը հրաժարվում է որևէ տեղեկատվություն տրամադրել ընդդիմադիր գործչի գտնվելու վայրի մասին։
Սեպտեմբերի 11-ին Բելառուսի իշխանությունները ազատ են արձակել 52 քաղբանտարկյալի՝ ԱՄՆ նախագահ Դոնալդ Թրամփի օգնականի տեղակալ Ջոն Քոուլի գլխավորած պատվիրակության հետ համաձայնագրերի շրջանակներում։
Նրանց թվում էր նաև Բելառուսի ընդդիմության վաղեմի առաջնորդներից մեկը՝ Ստատկևիչը, որը 2010 թվականին Բելառուսի նախագահի թեկնածու էր։ Ազատ արձակված բանտարկյալներին տարել են Լիտվայի հետ սահման, սակայն Ստատկևիչը հրաժարվել է լքել երկիրը և դուրս եկել չեզոք գոտի, որտեղ նա մի քանի ժամ նստել է։ Դրանից հետո լիտվացի սահմանապահները հայտնել էին, որ Ստատկևիչը լքել է չեզոք գոտին և վերադարձել Բելառուս։ Մի քանի օր նրա մասին ոչինչ հայտնի չէր։
Նիկոլայ Ստատկևիչը դատապարտվել է 6 տարվա ազատազրկման 2010 թվականի դեկտեմբերին բողոքի ցույցին մասնակցելու համար և ազատ է արձակվել 2015 թվականին։ Դրանից հետո նա կրկին զբաղվել է քաղաքական գործունեությամբ և ձերբակալվել է 2020 թվականի մայիսին։ Նա դատապարտվել է 14 տարվա ազատազրկման հատուկ ռեժիմի ուղղիչ գաղութում՝ մեղավոր ճանաչվելով զանգվածային անկարգություններ կազմակերպելու մեջ։
Թարգմանությունը՝ Էմմա Չոբանյանի
