ՀՀ-ն հարատև չի լինի՝ առանց Թուրքիայի և Ադրբեջանի հետ կարգավորման․ մեր սահմանների 80%-ը նրանց հետ է՝ բլոկադայի տակ․ Արեգ Քոչինյան. ՏԵՍԱՆՅՈՒԹ

Անվտանգային քաղաքականության հետազոտական կենտրոնի ղեկավար, քաղաքագետ Արեգ Քոչինյանը Factor TV-ի հետ զրույցում պնդում է՝ «Թրամփի ուղին» հաղթանակ է և՛ ՀՀ-ի, և՛ Ադրբեջանի համար, քանի որ ԱՄՆ-ն անվտանգության շերտ է բերում ապաշրջափակմանը։ Ըստ նրա՝ Ադրբեջանում առկա է ՀՀ-ի և ապաշրջափակման թեմայի վերաբերյալ դրական հռետորաբանության փոփոխություն։ Քոչինյանը պնդում է, որ ՀՀ-ն չպետք է ապավինի Ռուսաստանի ենթադրյալ զսպող դերին և պիտի փորձի կարգավորումների գնալ․

«Ռուս-թուրքական պատերազմի կամ գործարքի թիվ մեկ զոհը մենք ենք․ կորցրինք Արցախը, Կարսը։ Գուցե մե՞նք ենք սխալ բան անում, գուցե սխալվում ենք՝ կարծելով, որ ՌԴ-ն է հարց լուծողը, անհնար է Թուրքիայի և Ադրբեջանի հետ կոմպրոմիսի գալ։ Ռուսները գցում են մեզ միշտ, Ադրբեջանը ՌԴ-ին գրողի ծոցն ուղարկեց, չպահեց նրան։ Իսկ Թուրքիան պատերազմով հարց լուծեց ռեգիոնում, և կարծում եմ՝ ողբերգություն է, որ ՀՀ-ն չտեսնի այս իրականությունը»,- ասաց Արեգ Քոչինյանը։

ՀՀ Կառավարության որոշմամբ այս նոյեմբերի 1-ից ՀՀ մուտքի կամ ելքի սահմանահատման կնիքի վրա այլևս չի լինելու Արարատի պատկերը, չեն լինելու նաև այլ տեղեկություններ, բացառությամբ սահմանահատման վերաբերյալ: Սա նույն պատմությունն է, ինչ ՀՖՖ-ի լոգոյի վրայից Արարատի պատկերի հանե՞լը, թե՞ պարզապես Թուրքիային զիջում է՝ հանուն սահմանի բացման, կամ էլ՝ իշխանության ապազգային վարքը։

Քոչինյանը պատասխանում է․ «Էժան զիջում է, եթե կնիքից Արարատը հանելու դիմաց Թուրքիան բացելու է սահմանը․ չի նսեմանում արժանապատվությունս։ Կիկոսի մահի է նմանվում, որ կնիքից հանեցին Արարատը, վա՛յ, կկորչենք․ հայրենասիրությունն իջեցվել է թուրքատյացության մակարդակի։ Առանց Թուրքիայի և Ադրբեջանի հետ կարգավորման՝ ՀՀ-ն հարատև չի լինելու․ մեր սահմանների 80%-ը նրանց հետ է՝ բլոկադայի տակ։ Ինքնախաբեությո՛ւն է, ՌԴ-ն մեզ չի փրկում թուրք-ադրբեջանական վտանգից, գայլերից պաշտպան չունենք, պիտի լեզու գտնենք նրանց հետ, եթե ուզում ենք մնալ այստեղ»,- ասում է փորձագետը։

Հարցազրույցն ամբողջությամբ՝ տեսանյութում։
Ռոբերտ Անանյան