19.12.2025 | 23:33
ԱՄՆ-ի, Ռուսաստանի և Ուկրաինայի բանակցությունների նոր փուլը տեղի կունենա ԱՄՆ-ում առաջիկա օրերին
Հայաստանի համար զենքի և սպառազինության ձեռքբերման շուկաներն անսահմանափակ են․ վարչապետ
Քաղաքականություն
15.09.2025 | 14:08
«Համապարփակ անվտանգություն և դիմակայություն 2025» միջազգային համաժողովում ունեցած ելույթում վարչապետ Նիկոլ Փաշինյանը խոսել է Հայաստանի անվտանգության ռազմավարության համատեքստում բանակի դերի մասին՝ կարևորելով հասկացությունների հստակեցումը։
«Մենք անընդհատ ասել ենք, որ մեզ պետք է ուժեղ բանակ։ Բայց սա էլ է այն թեմաներից, որ հարց պիտի տանք ինքներս մեզ․ իսկ ի՞նչ է նշանակում ուժեղ բանակ։ Ուժեղ ումի՞ց՝ մեկ, երկու, երեք թե չորս պայմանական հակառակորդից։ Եթե պարզվի, որ մի պայմանական հակառակորդն իր հետ ունի ևս երկու-երեք գերուժեղ ներգրավված կողմ, ստացվելու է, որ մեր ռազմավարությունները զրո են»,- «Արմենպրես»-ի հաղորդմամբ՝ ասել է Փաշինյանը։
Նրա խոսքով՝ անհրաժեշտ է հստակեցնել, թե ուժեղ ասելով նկատի է առնվում բանակը դաշնակիցների՞ հետ միասին, թե՞ առանց նրանց։ «Եթե նրանց հետ միասին, այստեղ էլ տասնյակ հարցեր են ծագում։ Եթե առանց նրանց, այստեղ էլ են հարցեր ծագում։ Եվ հետևաբար այստեղ էլ հասկացությունները ճշտելու շատ կարևոր կենսական անհրաժեշտություն կա»,-հավելել է նա։
Վարչապետը շեշտել է, որ այս հարցից բխում է բանակի հիմնական խնդրի ձևակերպումը։ «Հայաստանի Հանրապետության բանակը Հայաստանի Հանրապետության միջազգայնորեն ճանաչված տարածքից դուրս անելիք չունի, խնդիր չունի։ Բանակի խնդիրը Հայաստանի Հանրապետության միջազգայնորեն ճանաչված տարածքի պաշտպանությունն ապահովելն է։ Սա է լեգիտիմության ռազմավարությունը բանակի պարագայում»,-շեշտել է Փաշինյանը։
Նա հավելել է, որ այս մոտեցումն արդեն տվել է տեսանելի արդյունք։ «Նախկինում Հայաստանի զենքի և սպառազինության ձեռքբերման շուկաները խիստ սահմանափակ էին ոչ միայն աշխարհագրությամբ, այլ նաև հասանելիությամբ։ Հիմա մեր շուկաներն, ըստ էության, անսահմանափակ են։ Ինչու՞, որովհետև որևէ երկիր մեզ հետ ռազմատեխնիկական ոլորտում համագործակցության հարց քննարկելիս չունի մտավախություն, որ այդ սպառազինությունը կարող է օգտագործվել միջազգային ոչ լեգիտիմ նպատակներով։ Որևէ մեկը չի կարող վիճարկել Հայաստանի Հանրապետության ինքնիշխան միջազգայնորեն ճանաչված տարածքը պաշտպանելու իրավունքը։ Դա անվիճարկելի է»,-եզրափակել է Փաշինյանը։
