Փաստաբանը պնդում է՝ ոստիկանները սեռական բնույթի հայհոյանքներ են հնչեցրել «Սասնա ծռերի» հարազատների հասցեին

Փաստաբան Մուշեղ Շուշանյանը ոստիկանապետ Վլադիմիր Գասպարյանի գրությունը անհեթեթ է համարում: Նա հայտարարում է՝ իր նկատմամբ հարուցված կարգապահական վարույթը հնարավորություն է ընձեռելու Ոստիկանությանը տրված իր գնահատականը շատ ավելի հանգամանալից ներկայացնել: 
Factor.am-ի հետ զրույցում փաստաբանն ասաց, որ ինքը համոզված էր՝ Փաստաբանների պալատն իր նկատմամբ վարույթ կհարուցի:

«Երբ փաստաբանների պալատից ինձ ուղարկեցին Ոստիկանության պետի գրությունը, և ինձ առաջարկեցին այդ գրության վերաբերյալ պատասխան ներկայացնել, անկեղծ ասած, ես չէի պատկերացնում՝ ինչ պատասխանել, որովհետև ոստիկանության պետի գրությունը անհեթեթ մտքերի գրություն էր, անհեթեթությանը պատասխան տալը բավական բարդ է»,- մեզ հետ զրույցում ասաց փաստաբանը:

Հիշեցնենք՝ ՀՀ ոստիկանության պետ Վլադիմիր Գասպարյանը, դիմելով Հայաստանի Հանրապետության Փաստաբանների պալատ, հայտնել է, որ փաստաբան Մուշեղ Շուշանյանը մեկնաբանելով «Սասնա ծռերի» գործով դատավարության ընթացքում դատարանի շենքի մոտ հասարակական կարգի պահպանություն իրականացնող ոստիկանության ծառայողների գործողությունները, իրավապահ մարմնի հասցեին հնչեցրել է անհարգալից արտահայտություններ:

Ոստիկանության դիմումում նշվում է, որ փաստաբան Մուշեղ Շուշանյանի գործելաոճն ուղղակիորեն վնասում է իրավապահ ամբողջ համակարգի նկատմամբ հանրային վստահության ամրապնդմանը և որևէ աղերս չունի փաստաբանի մասնագիտության բովանդակության և հասարակական կոչման հետ:

«Սասնա ծռեր» խմբի անդամ Վարուժան Ավետիսյանի փաստաբանը վերահաստատեց Ոստիկանությանն ուղղված իր գնահատականը և կրկին պնդեց՝ դատարանի շենքի դիմաց լսել է՝ ինչպես են ոստիանության ներկայացուցիչները հայհոյել «Սասնա ծռեր» խմբի անդամների հարազատներին:

«Ոստիկաններն ակնհայտորեն սադրում էին, ես ինքս լսել եմ՝ ինչպես են սեռական բնույթի հայհոյանքներ հնչեցնում հավաքված մարդկանց հասցեին, այդ թվում՝ կանանց: Կրկնում եմ՝ Ոստիկանություն այդ օրն իրականացրել է «հատուկ գործողություն»»,- պնդեց փաստաբանը:

Մանրամասները՝ տեսանյութում:

Շողիկ Գալստյան