15.03.2026 | 15:45
Սլովակիան հանել է Ռուսաստանի դեմ ԵՄ պատժամիջոցների արգելափակումը
ՀՀԿ, ՀՅԴ, ԲՀԿ․ սրանք եղել են ինադու ընդդիմություն, մեզ հիմա պետք է գաղափարական ընդդիմություն․ Անուշ Սեդրակյան
Քաղաքականություն
23.10.2018 | 15:37
2018 թվականի հոկտեմբերին կայացած ՏԻՄ ընտրություններում ձևավորվեց մի հետաքրքիր պատկեր․այս ընտրություններն ավելի արդար էին, իսկ ինչ վերաբերում է այս և նախորդ ընտրությունների տարբերությանը, ապա դրանցից պետք է առանձնացնեմ հետևյալը․ հոկտեմբերի 21-ի ՏԻՄ ընտրության քաղաքական ներկապնակն ավելի գունեղ էր։ Այս ամենով հանդերձ, պետք է նշեմ, որ այս վերջին ընտրությունների ժամանակ կրկին ականատես չեղանք գաղափարների և ծրագրերի մրցակցության։ Այս մասին այսօր հրավիրված մամուլի ասուլիսի ժամանակ ասաց քաղաքագետ Անուշ Սեդրակյանը՝ շեշտելով, որ ժամանակն է անցնել հեղափոխության երկրորդ փուլին և սկսել ծրագրերի իրականացման գործընթաց։
Անդրադառնալով Ընտրական օրենսգրքի փոփոխությունների նախագծի քվեարկության ժամանակ ստեղծված պատկերին, Սեդրակյանը նշեց, որ այն տապալվել է բոլոր խմբակցությունների համատեղ գործունեության արդյունքում, հետևաբար, անհրաժեշտ է միասնական չափանիշներ կիրառել բոլոր քաղաքական ուժերի նկատմամբ։
«Միասնական չափանիշ է մեզ պետք․ օրինակ՝ կամ պետք է բոլոր նախկին կոալիցիաները դեմոնիզացվեն, կամ՝ համաներվեն, կամ բոլոր օլիգարխները ենթարկվում են պատժի, կամ՝ համաներվում են․ պետք է կիրառել այդ չափանիշը, որը հետագայում կդառնա ուղղորդող պետական ծրագրի իրականացման ժամանակ, քանի որ, երբ հեղափոխական իշխանությունը դառնա պետական իշխանություն, պետք է սկսի երկրի պետականաշինությունը»,- տեսակետ հայտնեց քաղաքագետը։
Անդրադառնալով քաղաքական կյանքի մաս կազմող ընդդիմության անհրաժեշտությանն էլ՝ Սեդրակյանը հավելեց, որ հեղափոխությունից հետո պետք է լինի գաղափարական ընդդիմություն. «ՀՀԿ, ՀՅԴ, ԲՀԿ․ սրանք եղել են ինադու ընդդիմություն, այսուհետ մեզ պետք է գաղափարական ընդդիմություն»։
