Մեծ Բրիտանիայի արքայազն Հարրին ու Լեհաստանի ԱԳ նախարարը ժամանել են Կիև

Այսօր Կիև են ժամանել Մեծ Բրիտանիայի արքայազն Հարրին և Լեհաստանի արտգործնախարար Ռադոսլավ Սիկորսկին, գրում են ուկրաինական լրատվամիջոցները։

Արքայազն Հարրին ժամանել է Ուկրաինայի կառավարության հրավերով՝ նշելով, որ ցանկանում է անել «հնարավոր ամեն ինչ»՝ պատերազմում վիրավորված հազարավոր զինվորների ապաքինմանը նպաստելու համար։

Ուկրաինայի մայրաքաղաք կատարած ուղևորության ընթացքում նա և իր Invictus Games հիմնադրամի թիմը նախատեսում են  վիրավորների վերականգնմանը նպաստող նոր նախաձեռնություններով հանդես գալ։ Բացի այդ՝ Կիևում այցով գտնվում է նաև Լեհաստանի արտաքին գործերի նախարար Ռադոսլավ Սիկորսկին։

Ուկրաինայի արտաքին գործերի նախարար Անդրեյ Սիբիհան ողջունել է Սիկորսկուն Կիևում։

«Բարի գալուստ Կիև, Ռադեկ։ Ես ուրախ էի այսօր առավոտյան Կիևի երկաթուղային կայարանում հանդիպել Լեհաստանի ԱԳ  Ռադոսլավ Սիկորսկու և ամերիկացի լրագրող ու պատմաբան Էնն Էփլբաումի հետ։ Ռուսաստանի կողմից Ուկրաինայի դեմ ահաբեկչության սրման և Լեհաստանի դեմ սադրանքների ֆոնին մենք ամուր կանգնած ենք միասին։ Այսօր մենք կանցկացնենք բովանդակալից բանակցություններ մեր ընդհանուր անվտանգության, Ուկրաինայի ԵՄ-ին և ՆԱՏՕ-ին անդամակցության, ինչպես նաև Մոսկվայի վրա ճնշման վերաբերյալ։ Ես շնորհակալություն եմ հայտնում Լեհաստանին իր առաջնորդության և աջակցության համար»,- գրել է նա իր սոցցանցերում։

Միևնույն ժամանակ, Reuters-ը հաղորդում է, որ Մեծ Բրիտանիայի ԱԳՆ ղեկավար Իվետ Քուփերը կժամանի Կիև ուրբաթ՝ սեպտեմբերի 12-ին։ Սա նրա առաջին արտասահմանյան այցը կլինի նշանակումից հետո։ Քուփերը կհանդիպի նախագահ Վլադիմիր Զելենսկիի և Ուկրաինայի բարձրաստիճան պաշտոնյաների հետ։ Նա կհաստատի Մեծ Բրիտանիայի հանձնառությունը Ուկրաինան ռուսական ագրեսիայից պաշտպանելու հարցում։

Հավելենք, որ նախօրեին էլ Կիև էր ժամանել ԱՄՆ նախագահի հատուկ ներկայացուցիչ Քիթ Քելլոգը։

Թարգմանությունը՝ Էմմա Չոբանյանի