«Մտածում եք՝ ես կարող եմ գլո՞ւխ կախել ձեր դիմաց կամ դառնամ «ստուկա՞չ»». Ղուկասյանը՝ որդու ձերբակալման մասին

«Եթե հաշիվ եք մաքրում, եթե հոր հետ հարցեր ունեք, ապա ինչո՞ւ եք ընտանիք մտնում, գետի՛նը մտնեք։ Եթե հարց ունեք հոր հետ, ընտանիք ինչի՞ եք մտնում։ Երեխուն տանում ա մանկապարտեզ, ճանապարհին թափում եք վրե՞ն, սրանով ինչ եք ուզում ասած լինեք։ Ես հիմա ինձ վատ եմ զգում, թոռներիս երեսին ո՞նց եմ նայելու. ոնց որ ես լինեմ պատճառը»,- անդրադառնալով որդու ձերբակալմանը՝ լրագրողների հետ զրույցում ասաց Գյումրիի քաղաքապետ Վարդան Ղուկասյանը։

Հիշեցնենք՝ FactorTV-ն տեղեկացրել էր, որ Սպարտակ Ղուկասյանը ձերբակալվել է. Մեր տեղեկություններով՝ նա մեղադրյալ է ներգրավվել շորթման գործի շրջանակներում, ձերբակալվել է և կալանքի միջնորդություն է ներկայացվել դատարան.

«Երկու ամիս կալանքի են տարել։ Էն անգամ էլ տարան 2 ամիս կալանք, հետո էլի 2 ամիս. 9 ամիս հետո՝ արդարացրին, հետո էլի արդարացրին, ինչքան կարելի ա, վերջը սրան չափ ու սահման կա՞։ Ինչ ուզում եք արեք, ավելի շատ ձայներ կհավաքենք»,- ասաց Ղուկասյանը։

Գյումրիի քաղաքապետի պնդմամբ՝ տղային որևէ ծանուցում չի եկել հարցաքննության կամ ոստիկանություն ներկայանալու մասին.

«Օրինական պայքարելու եմ մինչև վերջ, ինչքան նմանատիպ բաներ անեն։ Իրենք չեն պատկերացնում, որ ես իմ տղայի անունը Սպարտակ եմ դրել, այսինքն՝ ազատության համար առաջին անունն եմ դրել։ Դուք մտածում եք, որ ես կարող եմ գլո՞ւխ կախել ձեր դիմաց կամ մյուսների նման դառնամ «ստուկա՞չ», երբե՛ք»։

Վարդան Ղուկասյանի խոսքով՝ որդու նկատմամբ քրեական գործը 24 քմ խիբարի հետ է կապված, որը քաղաքապետարանում որպես գույք նստած չի եղել։ Սակայն, նրա կարծիքով՝ սա քաղաքական գործողություն է իր դեմ.

«Ոչի՛նչ, ձեր տուն էլ կմտնեն։ Բայց ես ոչ ոքի նույն բանը չեմ ցանկանում, ես էնքան բարի մարդ եմ. դուք դրանով ինձ չեք կոտրում, ինչքան սենց բաներ անեք, մենք ավելի կհզորանանք, եթե մարմինս կոտրես, հոգիս չես կարող կոտրել։ Բռնել տալով երկիր չեն պահում, պատին ծեփելով, ասֆալտին փռելով մարդկանց ավելի քո դեմ ես հանում։ Գյումրիում պարտությունը էդքան ցա՞վ է պատճառել։ Արցախը տվեցիք, էդքան չեք խառնվել իրար, էս Գյումրու քաղաքապետարանի համար էս ինչ ոռնոց եք դրել։ Ինչի՞, էստեղից շատ ատկադ էիք տանում։ Լռվեք մնացեք, թե չէ կհանեմ կդնեմ խայտառակ կանեմ սաղ»։

Վերջինս հիշեցրեց 2007 թվականի ապրիլի 7-ի իր դեմ մահափորձի մասին, որի ժամանակ 4 հոգի մահացան, իսկ ինքն ու փոխքաղաքապետը վիրավորվեցին.

«Մինչև էսօր գործը չի բացահայտվել, փոխանակ գնաք էդ հարցերի մասին մտածեք, Երևանից զո՞րք եք բերել»։

Ղուկասյանը դիմեց իշխող խմբակցությանը՝ կոչ անելով Փաշինյանին սաստել.

«Երբ ՀՀԿ-ն մի սխալ բան էր անում, ես Սերժ Սարգսյանին ասում էի՝ մենք ապրելու ենք էս երկրում, էնպես արեք, որ մենք հանկարծ գլուխներս կախ ման չգանք։ Գնացեք ձեր մեծերին նույնն ասեք»։

Ռոզա Վարդանյան