18.12.2025 | 01:35
Տհաճ միջադեպ՝ Արման Ծառուկյանի մենամարտի ժամանակ. ՏԵՍԱՆՅՈՒԹ
Դավիթ Տոնոյանը գլխով է պատասխանատու Գևորգ Հարոյանի մահվան համար․ Ժաննա Ալեքսանյան
Հասարակություն
23.10.2018 | 12:50
Հեղափոխության ընթացքում բանակում տեղի են ունեցել մահվան դեպքեր, որոնք բոլորը որակված են որպես ինքնասպանություններ: Այս մասին այսօր «Մարդու իրավունքների վիճակը բանակում 2018 թ.» թեմայով քննարկման ժամանակ ասաց «Լրագրողներ հանուն մարդու իրավունքների» ՀԿ-ի նախագահ Ժաննա Ալեքսանյանը։
Վերջինս նշեց, որ ամբողջ ժողովուրդը մասնակցել է հեղափոխությանը, և իրավացիորեն կարող է պահանջել բանակին առնչվող խնդիրների լուծում, քանի որ ակնհայտ է, որ բանակում առկա խնդիրներին լուծումներ այդպես էլ շարունակում են չտալ։
Ժաննա Ալեքսանյանը քննարկման ընթացքում առանձացրեց հոկտեմբերի 1-ին բանակում ինքնասպան եղած զինծառայող Գևորգ Հարոյանի մահվան դեպքը։
«Անձը մեկնում է բանակ՝ իր պարտքը կատարելու, և ծնողներին վերադարձնում են դիակները՝ ինքասպանության որակումով»,- ասաց իրավապաշտպանը՝ մանրամասներ ներկայացնելով ինքնասպանությունից առաջ զինծառայողի և նրա մոր խոսակցությունից։
«Գևորգ Հարոյանը բանակում եղել է վատ վիճակում, նրա մահվանից մեկ օր առաջ ծնողը գնացել է նրան այցելության, Գևորգը չի թաքցել, որ դժոխքում է ծառայում, ոչ թե զորամասում, բողոքել է, որ իր նկատմամբ վատ մթնոլորտ կա ստեղծված, եղել է կապտուկներով։ Հիմա հարց է առաջանում՝ եթե զինվորը զորամասում ծառայում է կապտուկներով, այդ զորամասի հրամանատարական կազմն ի՞նչ է անում»,- ասաց Ժաննա Ալեքսանյանը։
Վերջինս նշեց, որ զինվորի մահվանից հետո իրենք չեն տեսնում պաշտպանության նախարար Դավիթ Տոնոյանի հրապարակային ելույթն ու ներողությունը։
«Նա գլխով պատասխանատու է այդ ամենի համար, սակայն իր կողմից քար լռություն է։ Բանակի ղեկավարությունը պետք է վերլուծական կենտրոն բացի և տեսնի՝ ինչո՞ւ են զինվորները ինքնասպանություն գործում․ չէ՞ որ նորմալ պայմաններում զինվորն ինքնասպան չի լինումի։ Պաշտպանության նախարարությունը պետք է հանդես գա հայտարարությամբ»,- ասաց Ալեքսանյանը՝ շեշտելով, որ եթե անգամ Գևորգ Հարոյանն ինքնասպան է եղել, միևնույնն է, դրա պատասխանատվությունը կրում է Պաշտպանության նախարարությունը։
Հիշեցնենք, որ հոկտեմբերի 1-ին, ժամը 10:50-ի սահմաններում, Արցախի N զորամասի պարտադիր ժամկետային զինծառայող, շարքային Գևորգ Սուրենի Հարոյանը, վաշտի զինանոցում ինքն իրեն կրծքավանդակի շրջանում հասցրել է հրազենային վիրավորում, տեղափոխվել զինվորական հոսպիտալ, որտեղ նույն օրը՝ ժամը 15:05-ի սահմաններում, գրանցվել է նրա կենսաբանական մահը: Դեպքի առթիվ առաջին կայազորային քննչական բաժնում՝ ՀՀ քրեական օրենսգրքի 110-րդ հոդվածի 1-ին մասով հարուցվել է քրեական գործ, կատարվում է նախաքննություն:
Այս հայտարարության մեջ տեղ գտած՝ ինքն իրեն վնասվածք հասցնելու հետ, զինվորի ծնողները համաձայն չեն: Նրանց պնդմամբ` զինվոր Գևորգ Հարոյանին նախ դաժանաբար ծեծել են, հետո՝ սպանել:
