Քաղաքականություն
10.09.2025 | 23:30
Թուրքիան և Եգիպտոսը զգուշացրել են ՀԱՄԱՍ-ի առաջնորդներին խստացնել անվտանգությունը Դոհայում Իսրայելի կողմից օդային հարվածից մի քանի շաբաթ առաջ իրենց հանդիպումների ժամանակ։ Այս մասին հաղորդել է The Wall Street Journal-ը, փոխանցում է Turkish Minute-ը։
Իսրայելի ռազմական ինքնաթիռները երեքշաբթի օրը հարվածել էին Դոհայի հյուսիսում գտնվող ՀԱՄԱՍ-ի կողմից վերահսկվող բնակելի շենքին, ինչը Իսրայելի կողմից Կատարի տարածքում պաշտոնապես ճանաչված առաջին հարձակումն է։
Հաղորդագրության համաձայն՝ Իսրայելի վարչապետ Բենիամին Նեթանյահուն թույլատրել է գործողությունը երեքշաբթի կեսօրին, այն բանից հետո, երբ անվտանգության ղեկավարները ներկայացրել են ՀԱՄԱՍ-ի բարձրաստիճան առաջնորդներին թիրախավորելու հնարավորությունը։ Առնվազն 10 իսրայելական կործանիչներ հեռահար զինամթերք են արձակել Կատարի օդային տարածքից դուրս՝ հարվածելով այն շենքին, որտեղ հավաքվել էին ՀԱՄԱՍ-ի առաջնորդները։
WSJ-ն, հղում անելով իսրայելցի և արաբ պաշտոնյաներին, նշել է, որ հանդիպումը հրավիրվել է հատուկ դեսպան Սթիվ Ուիթկոֆի կողմից ներկայացված ԱՄՆ-ի նոր հրադադարի և պատանդների ազատ արձակման առաջարկը քննարկելու համար։
Նշվում է, որ ներկաների թվում են եղել ՀԱՄԱՍ-ի առաջնորդներ Խալիլ ալ-Հայյան և Զահեր Ջաբարինը, չնայած ՀԱՄԱՍ-ը հետագայում հայտարարել է, որ իր բարձրաստիճան ղեկավարությունը ողջ է մնացել հարվածից, մինչդեռ հինգ ցածրաստիճան անդամներ զոհվել են։
Լրատվամիջոցը հայտնել է, որ Իսրայելը ԱՄՆ ռազմական պաշտոնյաներին տեղեկացրել է հարձակման մասին այն սկսելուց ընդամենը մի քանի րոպե առաջ՝ առանց բացահայտելու ճշգրիտ թիրախը։
WSJ-ն հայտնել է, որ Սպիտակ տունը տեղեկացվել է այն բանից հետո, երբ հրթիռներն արդեն օդում էին, իսկ նախագահ Դոնալդ Թրամփը հետագայում «դժգոհություն» է հայտնել հարվածի և դրա վայրի վերաբերյալ։
Կատարի էմիր շեյխ Թամիմ բին Համադ ալ-Թանին դատապարտել է հարձակումը Թրամփի հետ հեռախոսազրույցում, տարածաշրջանի արաբական կառավարությունները քննադատել են հարվածը՝ այն համարելով ինքնիշխանության խախտում։
Թարգմանությունը՝ Էմմա Չոբանյանի
