12.09.2026 | 10:04
ՀՀ տարածքում ավտոճանապարհներն անցանելի են
Երևանի խցանումները նվազե՞լ են, թե՞ ավելացել․ Փա՞ստ, թե՞ փուստ. ՏԵՍԱՆՅՈՒԹ
Քաղաքականություն
09.09.2025 | 22:00
Այսօր մնացե՞լ եք Երևանի խցանումներում․ Երևանի քաղաքապետարանում պնդում են, որ քաղաքում խցանումները նվազել են։ Ասում են՝ դա եղել է իրենց որոշումների, երթևեկության փոփոխությունների և դպրոցների դասերը շուտ սկսելու շնորհիվ։
Մեր ունեցած տվյալները այլ բանի մասին են փաստում։ Եվ այս ամենը ներկայացրել ենք «Փա՞ստ, թե՞ փուստ»-ի այսօրվա թողարկմանը։
«Ինչպես տեսնում եք, միջինացված խցանումների թիվը, նախորդ տարվա նույն ժամանակահատվածի հետ համեմատած, այսքան ավտոբուսի գիծ նոր ստեղծելով, միջինացված թիվն ավելի ցածր է»,- Երևանի քաղաքապետարանի գործակարգավարական նիստին ասել է քաղաքապետ Տիգրան Ավինյանը։
Քաղաքապետարանում այս պնդումների համար հղում են անում Yandex-ից իրենց ստացած տվյալներին։ Մենք օգտագործել ենք Yandex-ի սովորական տվյալները՝ խցանումները ցույց տվող քարտեզները։
Երեկվա խցանումների ժամերին մենք վերցրել ենք այդ քարտեզների էկրանանկարները՝ Ավինյանի և նրա գործընկերոջ պնդումները ստուգելու համար։ Yandex-ի քարտեզներում կա նաև կանխատեսվող խցանումները տեսնելու հնարավորություն։ Համակարգը դա հաշվարկում է՝ հիմնվելով նախկինում նույն օրերին եղած խցանումների տվյալների վրա։ Մենք այդ կանխատեսումները նույնպես արձանագրել ենք՝ համեմատելու համար։
Ստացվել է հետևյալ արդյունքը․ երեկվա փաստացի խցանումների ուժգնության բալերը կա՛մ նույն մակարդակի են եղել, կա՛մ ավելի բարձր, քան նախկինում։
Իսկ այսօր առավոտյան խցանումների ուժգնությունը միանգամից 2-3 բալով է գերազանցել նախկին տվյալների հիման վրա միջինացված ցուցանիշին։ Բայց նաև պետք է նշել, որ ժամը 11-ի դրությամբ խցանումները մեկ բալով ավելի թույլ են, քան նախկինում։
Մյուս պնդումները և ցուցանիշները կարող եք դիտել տեսանյութում։
«Փա՞ստ, թե՞ փուստ»-ի այս թողարկմանը մենք ձեզ ներկայացրինք Երևանում խցանումների մասին պաշտոնյաների պնդումները և դրանք համեմատեցինք բոլորիդ հասանելի փաստացի ցուցանիշների հետ։ Իսկ դուք ինքնուրույն որոշեք՝ խցանումների թեթևացման մասին պնդումները փա՞ստ են, թե՞ փուստ։
Գարիկ Հարությունյան
