Պուտինը ամերիկացիներին ասել է, որ մինչև տարեվերջ «կվերցնի Դոնբասը». Զելենսկի

Ռուսաստանի նախագահ Վլադիմիր Պուտինը ԱՄՆ նախագահի հատուկ ներկայացուցիչ Սթիվ Ուիթկոֆի  հետ զրույցում խոստացել է «վերցնել Դոնբասը» մինչև տարեվերջ, բայց իրականում դրա համար տարիներ և միլիոնավոր զոհեր կպահանջվեն։

Այս մասին հայտարարել է Ուկրաինայի նախագահ Վլադիմիր Զելենսկին ABC հեռուստաալիքին տված հարցազրույցում, գրում է ՌԲԿ Ուկրաինան։

«Նա (Պուտինը) ասում է, որ 3-4 ամսից, և հենց դա ասել է ամերիկացիներին, Սպիտակ տանը և նախագահ Թրամփի ներկայացուցիչ Ուիթկոֆին, կվերցնի Դոնբասը։ Նա ասել է, որ կգրավի այն մինչև տարեվերջ։ Գինը տարիներ են և մեկ միլիոն մարդ։ Եվ եթե ոչ տարիներ, ապա ավելի արագ, ապա պարզապես ավելի շատ մարդ։ Ոչ թե մեկ միլիոն մարդ, այլ երկու, երեք միլիոն դիակ»,- ասել է Զելենսկին։

ABC-ին տված հարցազրույցում Ուկրաինայի նախագահը նաև հիշեցրել է, որ այն պնդումը, թե, իբր, Ռուսաստանը երեք տարվա ընթացքում գրավել է Դոնբասի 70%-ը, մանիպուլյացիա է։ Նա հիշեցրել է, որ 10 տարի առաջ Կրեմլը գրավել է Ղրիմը և Դոնբասի մեկ երրորդը։ Սակայն, գրեթե չորս տարվա լայնածավալ պատերազմի ընթացքում Ռուսաստանի Դաշնությունը կարողացել է գրավել Դոնեցկի մարզի միայն 30%-ը, մինչդեռ Ուկրաինան վերահսկում է մոտ 32%-ը։

«Պատերազմի տարիներին, երբ մենք կռվում ենք լիարժեք մասշտաբով, նա վերցրել է ընդամենը 30%-ը։ Դա շատ է։ Բայց միլիոն մարդ։ Նա կորցրել է մեկ միլիոն մարդ», – ասել է Զելենսկին։ Նա չի նշել այս տեղեկության իր աղբյուրը։

Վլադիմիր Պուտինը հրապարակավ չի խոսել Կրեմլի կողմից 2025 թվականի վերջին Դոնբասը գրավելու ծրագրերի մասին։ 2025 թվականի մայիսին Bloomberg-ը, հղում անելով իր աղբյուրներին, հայտնել էր, որ Ռուսաստանի նախագահը ելնում է այս սցենարից՝ ռուսական զինվորականների կողմից Ուկրաինայի Դոնեցկի, Լուգանսկի, Խերսոնի և Զապորոժիեի շրջանների տարածքների լիակատար վերահսկողությունը ստանձնելու սցենարից, և դրա հիման վրա պլանավորում է ևս մեկ հեռախոսազրույց ԱՄՆ նախագահ Դոնալդ Թրամփի հետ։

Reuters-ն էլ հաղորդել էր, որ Ռուսաստանը կարող է հրաժարվել Ուկրաինայի որոշ օկուպացված տարածքներից, մասնավորապես՝ Խարկովի և Սումիի մարզերից, իսկ Ուկրաինան, իբր, պետք է զիջի արևելյան հողերի այն մասերը, որոնք Մոսկվան չի կարողացել գրավել։ Մասնավորապես, դա ներառում է Դոնեցկի մարզը։

Թարգմանությունը՝ Էմմա Չոբանյանի