Ըստ Կիևի՝ ՌԴ-ն «Իսկանդեր» բալիստիկ հրթիռով է հարվածել կառավարության շենքին

Ռուսաստանը Կիևում Ուկրաինայի կառավարության շենքի վրա հարձակման ժամանակ օգտագործել է «Իսկանդեր» բալիստիկ հրթիռ, գրում է France 24-ը։

Ուկրաինայի նախագահի աշխատակազմի ղեկավար Անդրեյ Երմակը հայտարարել է, որ կիրակի օրվա հարձակումը քննարկել է ԱՄՆ պետքարտուղար Մարկո Ռուբիոյի հետ։ «Առաջին անգամ թշնամին հարձակվել է Ուկրաինայի կառավարության շենքի վրա՝ օգտագործելով «Իսկանդեր» բալիստիկ հրթիռ», – գրել է Երմակը X-ում։

«Իսկանդերը» լայնորեն օգտագործվել է Ռուսաստանի կողմից Ուկրաինայում գտնվող այլ թիրախների դեմ, իսկ կիրակի օրը Ռուսաստանը պատերազմի մեկնարկից ի վեր անօդաչու թռչող սարքերի և հրթիռների ամենամեծ քանակն էր կիրառել Ուկրաինայի տարածքին հարվածելու համար։

Ուկրաինայում Եվրամիության դեսպան Կատարինա Մատերնովան անդրադարձել է հարվածի հետևանքներին։ «Միայն այն պատճառով, որ հրթիռը լիովին չի պայթել, ամբողջ շենքը չի վերածվել ավերակների», – ասել է նա։

Երկուշաբթի օրը Ուկրաինայի արտակարգ իրավիճակների ծառայության ղեկավար Անդրեյ Դանիկը հայտնել է, որ վնասվել է 800-ից 900 քառակուսի մետր տարածք։ Հարձակման հետևանքով հրդեհ է բռնկվել, որը շատ արագ տարածվել է։

Կիրակի օրվա ռեկորդային հարձակումից հետո, որի հետևանքով մի քանի մարդ զոհվել է և վիրավորվել, Կիևը կոչ է արել իր  դաշնակիցներին նոր տնտեսական պատժամիջոցներ կիրառել Մոսկվայի դեմ։

Երմակը նշել է, որ Ռուբիոյի հետ քննարկել է «Ռուսաստանի դեմ պատժամիջոցների խստացումը», ինչպես նաև՝ Կիևի կողմից հրադադարի դեպքում պահանջվող անվտանգության երաշխիքները։

Թարգմանությունը՝ Էմմա Չոբանյանի