14.09.2026 | 15:10
Ռուբինյանի արձագանքը Հաջիևի հայտարարություններին // Ռոբերտ Քոչարյանը սրտաբանի հսկողության ներքո է․ ԼՈՒՐԵՐ
Հիմնադրամի տնօրենը փոխվել է․ Factor TV-ի փաստաքննության հետքերով
Հասարակություն
05.09.2025 | 19:43
Factor TV-ի «Հեղափոխական կոռուպցիան` պոզով ու պոչով. ինչպես հիմնադրամի միլիոնները տալ եղբորն ու մնալ անպատիժ» փաստաքննությունից հետո ԱՆ իրավաբանական անձանց ռեգիստրում փոխվել է «Սևանի իշխանի պաշարների վերականգնման և ձկնաբուծության զարգացման» հիմնադրամի տնօրենը։
Հիմնադրամի արդեն նախկին տնօրեն Դավիդ Շանոյանը, հիշեցնենք, այդ պաշտոնին նշանակվել էր 2022 թվականի հոկտեմբերին և, ընդամենը 2 ամիս անց՝ դեկտեմբերի 20-ին, հարազատ եղբոր՝ Արայիկ Շանոյանի հետ կնքել փոխառության պայմանագիր ու նրան փոխանցել 8․8 մլն դրամ հիմնադրամի բյուջեից։ Այդ պարտքն Արայիկ Շանոյանը պետք է վերադարձներ 6 ամսվա ընթացքում, սակայն չէր վերադարձրել։ Այդպիսով, ըստ դատախազության, Դավիդ Շանոյանը 8․8 մլն դրամը չէր ծախսել հիմնադրամի ծրագրով նախատեսված նպատակներով և հիմնադրամի շահերին պատճառել էր առանձնապես խոշոր չափերի գույքային վնաս։
Չնայած դեռ դատախազության կողմից իր պաշտոնավարման կասեցմանը՝ Շանոյանը շարունակել էր ղեկավարել հիմնադրամը և հրաժարականի դիմում չէր ներկայացրել՝ նույնիսկ 2024-ի ապրիլի 26-ին դատարանի կողմից՝ ծառայողական լիազորությունները չարաշահելու և առանձնապես խոշոր չափերի գույքային վնաս պատճառելու համար մեղավոր ճանաչվելուց հետո (ՀՀ քրեական օրենսգրքի 441-րդ հոդվածի 2-րդ մասի 2-րդ կետ):
Factor TV-ն պարզել էր նաև, որ Դավիդ Շանոյանը ԱԿԲԱ ԲԱՆԿ-ից, Ինեկոբանկից, ԱՄԻՕ և ՎՏԲ-Հայաստան բանկերից, Կամուրջ և ՄՈԳՈ վարկային կազմակերպություններից, Դավիթ Հարությունյանից, վերցրել էր խոշոր գումարներ և չէր վերադարձրել՝ ընդհանուր մոտ 102 մլն դրամի չափով։ Իսկ 2024 թվականի մարտին Սնանկության դատարանը Շանոյանին սնանկ է ճանաչել (ՍնԴ/3519/04/23)։ Դա այն ժամանակ, երբ նա ղեկավարում էր «Սևանի իշխանի պաշարների վերականգնման և ձկնաբուծության զարգացման» հիմնադրամը։
Շրջակա միջավայրի նախարարությունից Factor TV-ին հավաստիացրել էին, թե Շանոյանն աշխատանքից ազատվել է 2024-ի հուլիսի 11-ին։
Սակայն, ինչպես տեղեկանում ենք պետական ռեգիստրից, հիմնադրամի գործադիր տնօրենի փոփոխությունը եղել է ոչ թե 2024 թվականին, այլ 2025-ի հուլիսի 28-ին՝ Factor TV-ի փաստաքննության հրապարակումից մոտ 1 ամիս անց։
Գայանե Խաչատրյան
