Կարևոր է խաղաղության պայմանագրի ստորագրումը և վավերացումը․ԵՄ-ն պատրաստ է ՀՀ-ին ու Ադրբեջանին լրացուցիչ աջակցություն տրամադրել

Եվրոպայի խորհրդում Եվրոպական միության պատվիրակությունը հայտարարություն է տարածել՝ ողջունելով օգոստոսի 8-ին Հայաստանի և Ադրբեջանի միջև վարչապետ Փաշինյանի և նախագահ Ալիևի միջև Սպիտակ տանը նախագահ Թրամփի ներկայությամբ կնքված համաձայնագիրը, որը «նշանակալի առաջընթաց է տասնամյակներ տևած հակամարտությանը վերջ դնելու գործում»։

Ըստ պատվիրակության՝ այժմ կարևոր է ապահովել համաձայնեցված քայլերի ժամանակին իրականացումը, մասնավորապես, խաղաղության պայմանագրի ստորագրումը և վավերացումը։

«Անցյալ տարվա մարտին խաղաղության համաձայնագրի տեքստի շուրջ Հայաստան-Ադրբեջան երկկողմ բանակցությունների ավարտից հետո սա կարևոր և վճռական քայլ է դեպի Հայաստանի և Ադրբեջանի միջև հարաբերությունների լիարժեք կարգավորումը՝ հիմնված միմյանց ինքնիշխանության, տարածքային ամբողջականության և սահմանների անձեռնմխելիության փոխադարձ ճանաչման վրա՝ համաձայն 1991 թվականի Ալմա-Աթայի հռչակագրի։Համաձայնեցված քայլերի իրականացումը դրական ազդեցություն կունենա տարածաշրջանի ընդհանուր խաղաղ զարգացման վրա և կնպաստի հակամարտությունների ժառանգությամբ բաժանված հասարակություններին մոտեցնելուն կայուն խաղաղության և համատեղ բարգավաճման»,-ասվում է հայտարարության  մեջ։

ԵՄ-ն նշում է այս կարևոր ընթացքի պահպանումը՝ հաշվի առնելով նաև Եվրոպայի խորհրդի  գլխավոր քարտուղար Բերսեի կողմից հաստատված այն փաստը, որ Եվրոպայի խորհուրդը պատրաստ է աջակցել Հայաստանին և Ադրբեջանին, քանի որ նրանք  շրջում են իրենց համատեղ պատմության այս էջը։

«ԵՄ-ն լիովին աջակցում է Հայաստան-Ադրբեջան հարաբերությունների կարգավորման գործընթացին և տարիներ շարունակ աշխատել է երկու կողմերի և մեր միջազգային գործընկերների հետ՝ երկարատև խաղաղության պայմաններ ստեղծելու համար: Մենք շարունակում ենք պատրաստ լինել գործընկերների հետ համագործակցել լիարժեք կարգավորման ուղղությամբ՝ տրամադրելով լրացուցիչ աջակցություն և փորձագիտություն, այդ թվում՝ հաջորդ քայլերի գործնական իրականացման համար»,-ասվում է հայտարարության մեջ։

Հայտարարությանը միացել են Ալբանիան, Անդորրան, Բոսնիա և Հերցեգովինան, Վրաստանը, Իսլանդիան, Լիխտենշտեյնը, Մոնակոն, Մոլդովան, Չեռնոգորիան, Նորվեգիան, Հյուսիսային Մակեդոնիան, Սան Մարինոն, Սերբիան, Ուկրաինան, Միացյալ Թագավորությունը։

Թարգմանությունը՝ Էմմա Չոբանյանի