14.07.2026 | 16:38
Քաղցրաշեն գյուղում 13-ամյա աղջիկ է մահացել․ վարչական շրջանի ղեկավարը՝ դեպքի մասին
Պորտուգալիայում ֆունիկլյորի վթարի հետևանքով առնվազն 15 մարդ է զոհվել, երկրում սգո օր է հայտարարվել
Քաղաքականություն
04.09.2025 | 12:32
Պորտուգալիայի մայրաքաղաք Լիսաբոնի արտակարգ ծառայությունները հայտնել են, որ չորեքշաբթի օրը քաղաքի խորհրդանշական ֆունիկլյորի վագոններից մեկը ռելսերից դուրս է եկել, զոհվել է առնվազն 15 մարդ, ևս 18-ը՝ վիրավորվել, գրում է DW-ն։
Վիրավորներից հինգը, այդ թվում՝ մեկ երեխա, գտնվում են ծանր վիճակում, նրանց մեջ կան օտարերկրացիներ։ Լիսաբոնի կենտրոնում գտնվող զառիթափ փողոցով վեր ու վար շարժվող հայտնի ֆունիկուլյորից օգտվում են թե՛ տեղացիները, թե՛ զբոսաշրջիկները։ Պորտուգալիայի կառավարությունը հայտարարել է, որ վթարի պատճառների հետաքննությունը կսկսվի փրկարարական գործողությունների ավարտից հետո։
Լիսաբոնի քաղաքապետ Կառլոս Մոեդասը վթարն անվանել է «աննախադեպ ողբերգություն» և ասել, որ քաղաքը սգի մեջ է։ Պորտուգալիայի կառավարությունը եռօրյա սուգ է հայտարարել երկրում։
1885 թվականին բացված «Գլորիա» ֆունիկուլյորը Լիսաբոնի կենտրոնի Ռեստորադորես հրապարակի մոտ գտնվող տարածքը կապում է Բայրո Ալտոյի (Վերին թաղամաս) հետ։
Երկու վագոնները, որոնցից յուրաքանչյուրը կարող է տեղափոխել մոտ 40 մարդ, ամրացված են բեռնատար մալուխի հակառակ ծայրերին, իսկ վագոնների էլեկտրական շարժիչները ապահովում են քարշակումը։
Քաղաքապետարանի տվյալներով՝ «Գլորիա» գիծը տարեկան մոտ 3 միլիոն մարդ է սպասարկում։
Թարգմանությունը՝ Էմմա Չոբանյանի
