05.11.2026 | 00:08
Ինչ է որոշել ընդդիմությունը. Նարեկ Կարապետյանը հանդիպումից հետո մանրամասներ հայտնեց. ՏԵՍԱՆՅՈՒԹ
Բելգիան հայտնել է սեպտեմբերին Պաղեստինը ճանաչելու և Իսրայելի նկատմամբ պատժամիջոցներ սահմանելու մտադրության մասին
Քաղաքականություն
02.09.2025 | 16:07
Բելգիան սեպտեմբերին ՄԱԿ-ի Գլխավոր վեհաժողովի նստաշրջանում կճանաչի Պաղեստինը որպես անկախ պետություն։ Այս մասին հայտարարել է երկրի արտաքին գործերի նախարար Մաքսիմ Պրևոն։
«Պաղեստինը կճանաչվի Բելգիայի կողմից ՄԱԿ-ի Գլխավոր վեհաժողովում։ Եվ Իսրայելի կառավարության նկատմամբ կկիրառվեն խիստ պատժամիջոցներ։ ՀԱՄԱՍ-ի կողմնակիցների կողմից ցանկացած հակասեմականություն կամ ահաբեկչության գովաբանում նույնպես ավելի խստորեն կդատապարտվի»,- գրել է բելգիացի նախարարը X-ի իր միկրոբլոգում։
Նա նշել է, որ հաշվի առնելով Պաղեստինում, մասնավորապես, Գազայում ծավալվող մարդասիրական ճգնաժամն ու Իսրայելի կողմից միջազգային իրավունքի խախտմամբ իրականացված բռնությունները, և հաշվի առնելով իր միջազգային պարտավորությունները, այդ թվում՝ ցեղասպանության ցանկացած ռիսկ կանխելու պարտականությունը, Բելգիան ստիպված է վճռական որոշումներ կայացնել՝ Իսրայելի կառավարության և ՀԱՄԱՍ-ի ահաբեկիչների վրա ճնշումը մեծացնելու համար։ Խնդիրը ոչ թե իսրայելցի ժողովրդի նկատմամբ պատժամիջոցներ կիրառելն է, այլ այն, որ իր կառավարությունը հարգի միջազգային և մարդասիրական իրավունքը և գործի տեղում իրավիճակը բարելավելու հույսով, հավելել է Պրևոն։
Հաղորդվում է, որ ազգային մակարդակով կիրառվում են տասներկու խիստ պատժամիջոցներ, այդ թվում՝ բնակավայրերից ապրանքների ներմուծման արգելք, իսրայելական ընկերությունների հետ պետական գնումների քաղաքականության վերանայում, միջազգային իրավունքի համաձայն անօրինական համարվող բնակավայրերում բնակվող բելգիացիներին հյուպատոսական օգնության սահմանափակումներ, հնարավոր քրեական հետապնդում, թռիչքների և տարանցման արգելքներ, ինչպես նաև երկու ծայրահեղական իսրայելցի նախարարների, մի քանի բռնի գաղութաբնակների և ՀԱՄԱՍ-ի առաջնորդների ներառումը Բելգիայում «անցանկալի անձանց» ցուցակում։
Եվրոպական մակարդակով Բելգիան կաջակցի Իսրայելի հետ համագործակցությունը կասեցնելու միջոցառումներին, որոնք պահանջում են որակյալ մեծամասնություն։
Բելգիան կմիանա Նյու Յորքի հռչակագիրը ստորագրող երկրներին, որը հարթում է երկու պետությունների լուծման ճանապարհը, հետևաբար, ենթադրում է երկու պետությունների ճանաչում։ Բրյուսելը ճանաչում է Պաղեստինը Ֆրանսիայի և Սաուդյան Արաբիայի համատեղ նախաձեռնության շրջանակում։
Միաժամանակ, Բելգիայի ԱԳՆ-ն նշել է, որ Պաղեստինը, անշուշտ, կդառնա Բելգիայի կողմից միջազգային ասպարեզում լիովին ճանաչված պետություն։ Գիտակցելով իսրայելցի ժողովրդի կողմից 2023 թվականի հոկտեմբերի 7-ին ՀԱՄԱՍ-ի ահաբեկչական հարձակումների հետևանքով կրած տրավմաները՝ այս ճանաչման վարչական ձևակերպումը տեղի կունենա թագավորական հրամանագրով՝ վերջին պատանդի ազատ արձակումից և Պաղեստինի ՀԱՄԱՍ-ի կառավարման ցանկացած ձևի ավարտից հետո, ասվում է հայտարարությունում։
Եվրոպական երեք երկրների՝ Նորվեգիայի, Իռլանդիայի և Իսպանիայի իշխանությունները դեռևս 2024 թվականի մայիսի վերջին էին հայտարարել Պաղեստին պետությունը ճանաչելու մտադրության մասին։ Այդ ժամանակ Պաղեստինը ճանաչվել էր ՄԱԿ-ի 193 անդամ պետություններից 143-ի կողմից (ներառյալ՝ Ռուսաստանը և Չինաստանը)։
2025 թվականին Ֆրանսիան, Կանադան, Մեծ Բրիտանիան և Ավստրալիան հայտարարեցին ՄԱԿ-ի Գլխավոր վեհաժողովում Պաղեստինը ճանաչելու իրենց ծրագրերի մասին։ Հավելենք, որ ՄԱԿ-ի 80-րդ Գլխավոր վեհաժողովը մեկնարկելու է սեպտեմբերի 9-ին Նյու Յորքում։
Թարգմանությունը՝ Էմմա Չոբանյանի
