20.12.2025 | 20:00
100,000 ռուբլի՝ ՀՀ-ում լրտեսության համար․ ՌԴ քաղաքացիները Հայաստանում տվյալներ են հավաքել․ ՏԵՍԱՆՅՈՒԹ
Ռուսաստանում ադրբեջանական սփյուռքի ևս մեկ ներկայացուցիչ է կալանավորվել
Քաղաքականություն
02.09.2025 | 11:42
Ռուսաստանի Կուբան քաղաքում կալանավորվել է ադրբեջանական սփյուռքի հայտնի ներկայացուցիչներից մեկը՝ Տուապսեի բեռնատար տերմինալի և Կրասնոդարի «Հին Բաքու» ռեստորանի սեփականատեր Շախլար Նովրուզովը։ Ադրբեջանական լրատվամիջոցների հաղորդմամբ՝ Նովրուզովը մեղադրվում է քրեական գործով 919 միլիոն ռուբլի արժողությամբ անշարժ գույքի յուրացման փորձի համար։
Հետաքննության տվյալներով՝ հանցագործությունը կատարելու համար մեղադրվողները, այդ թվում՝ Շախլար Նովրուզովը, դատարան են ներկայացրել ամուսնության վկայական, որը, ենթադրաբար, կնքվել է Ադրբեջանում։ Իրավապահ մարմինների տվյալներով՝ ներկայացված փաստաթուղթը կեղծ է եղել և օգտագործվել է գույքին տիրանալու համար։
Նովրուզովը կալանավորվել է մինչև սեպտեմբերի 26-ը։
Մեղադրյալի պաշտպան Ալեքսեյ Աբրամովը դատարանին խնդրել է մեղմացնել խափանման միջոցը։ Փաստաբանը նշել է, որ կասկածյալը 60 տարեկան է, մշտապես բնակվում է Կրասնոդարում և նախկինում դատվածություն չի ունեցել։ Սակայն քննիչը նշել է, որ Նովրուզովը կարող է փախչել։ Իրավապահ մարմինները դեռևս չեն բացահայտել Շախլար Նովրուզովի դեմ մեղադրանքների էությունը։
Դատարանի որոշման համաձայն՝ գործը վերաբերում է կազմակերպության կանոնադրական կապիտալի 100%-ին տիրանալու փորձին, որի անշարժ գույքը գնահատվում է 919,4 միլիոն ռուբլի։
Հիշեցնենք, որ ավելի վաղ էլ Եկատերինբուրգում (Ուրալում) ադրբեջանական սփյուռքի ղեկավար Շահին Շիխլինսկին էր ձերբակալվել։
Թարգմանությունը՝ Էմմա Չոբանյանի
